KHushi se dur hun na-ashna-e-bazm-e-‘ishrat hun

ḳhushī se duur huuñ nā-āshnā-e-bazm-e-‘ishrat huuñ

sarāpā dard huuñ vābasta-e-zanjīr-e-qismat huuñ

haqīqat meñ koī vāqif nahīñ merī haqīqat se

mu'amma huuñ kisī kā raaz huuñ yā sirr-e-qudrat huuñ

koī samjhe to kyā samjhe koī jaane to kyā jaane

kisī kā 'aks huuñ ā.īna-dār-e-bazm-e-hairat huuñ

gulistāñ kī chaman-ārā.iyoñ se mujh ko kyā matlab

ki pāband-e-qafas huuñ mubtalā-e-dard-e-ulfat huuñ

vo dil huuñ vo zabāñ huuñ jin meñ goyā.ī nahīñ goyā

mirī tarkīb kahtī hai ki tasvīr-e-mohabbat huuñ

ġhazab kī chaal gulshan meñ chalā hai bāġhbāñ 'mohsin'

usī kā ye natīja hai ki pāmāl-e-sa'ūbat huuñ

KHushi se dur hun na-ashna-e-bazm-e-‘ishrat hun

sarapa dard hun wabasta-e-zanjir-e-qismat hun

haqiqat mein koi waqif nahin meri haqiqat se

mu'amma hun kisi ka raaz hun ya sirr-e-qudrat hun

koi samjhe to kya samjhe koi jaane to kya jaane

kisi ka 'aks hun aaina-dar-e-bazm-e-hairat hun

gulistan ki chaman-araiyon se mujh ko kya matlab

ki paband-e-qafas hun mubtala-e-dard-e-ulfat hun

wo dil hun wo zaban hun jin mein goyai nahin goya

meri tarkib kahti hai ki taswir-e-mohabbat hun

ghazab ki chaal gulshan mein chala hai baghban 'mohsin'

usi ka ye natija hai ki pamal-e-sa'ubat hun