qarya-e-jaan se guzar kar humne ye dekha bhi hai

qarya-e-jāñ se guzar kar ham ne ye dekhā bhī hai

jis jagah ūñchī chaTāneñ haiñ vahāñ dariyā bhī hai

dard kā chaḌhtā samundar jism kā kachchā makāñ

aur un ke darmiyāñ āvāz kā sahrā bhī hai

ruuh kī gahrā.ī meñ paatā huuñ peshānī ke zaḳhm

sirf chāhā hī nahīñ maiñ ne use puujā bhī hai

raat kī parchhā.iyāñ bhī ghar ke andar band haiñ

shaam kī dahlīz par sūraj kā naqsh-e-pā bhī hai

chāñd kī kirneñ ḳharāsheñ haiñ dar-o-dīvār par

aur dar-o-dīvār ke pahlū meñ ik saayā bhī hai

ghar kā darvāza muqaffal hai agar dekhe koī

andar ik kohrām hai jaise koī rahtā bhī hai

jab maiñ 'aḳhtar' pattharoñ ko aa.ina dikhlā chukā

maiñ ne dekhā ā.inoñ ke haath meñ tesha bhī hai

qarya-e-jaan se guzar kar hum ne ye dekha bhi hai

jis jagah unchi chaTanen hain wahan dariya bhi hai

dard ka chaDhta samundar jism ka kachcha makan

aur un ke darmiyan aawaz ka sahra bhi hai

ruh ki gahrai mein pata hun peshani ke zaKHm

sirf chaha hi nahin main ne use puja bhi hai

raat ki parchhaiyan bhi ghar ke andar band hain

sham ki dahliz par suraj ka naqsh-e-pa bhi hai

chand ki kirnen KHarashen hain dar-o-diwar par

aur dar-o-diwar ke pahlu mein ek saya bhi hai

ghar ka darwaza muqaffal hai agar dekhe koi

andar ek kohram hai jaise koi rahta bhi hai

jab main 'aKHtar' pattharon ko aaina dikhla chuka

main ne dekha aainon ke hath mein tesha bhi hai