KHizr ke manind KHwahan zindagani ka nahin

ḳhizr ke mānind ḳhvāhāñ zindagānī kā nahīñ

ai ajal tishna maiñ us dariyā ke paanī kā nahīñ

qaid ho kar lutf 'umr-e-jāvedānī kā nahīñ

haz tumheñ ai ḳhizr apnī zindagānī kā nahīñ

mushtarī koī yahāñ jins-e-ma'ānī kā nahīñ

ek bhī gāhak matā'-e-nukta-dānī kā nahīñ

sin abhī kam hai na kholo rū-e-raushan se naqāb

aa.ina sūrat-numā husn-e-javānī kā nahīñ

kyuuñ utartā hai hamāre qulzum-e-mavvāj meñ

āshnā ai dost tū bahr-e-ma'ānī kā nahīñ

ik nazar sūrat dikhā kar kījiye mujh se hijāb

yuuñ maza ai banda-parvar lan-tarānī kā nahīñ

dīd-e-yūsuf kā faqat tālib huuñ ai bāzār-e-misr

ġham mujhe qīmat kī arzānī girānī kā nahīñ

bā-ma'ānī hai suḳhan merā samajh kar is ko dekh

ye jarīda ham-nashīñ arzhang-e-mānī kā nahīñ

dard ko ham-rāh kyuuñ laatā hai dil meñ vo ḳhadang

kyā salīqa ḳhud use rāhat-risānī kā nahīñ

dekh kar labrez-e-ḳhūñ kyā māñgte ho mujh se tum

dil hai ye sāġhar sharāb-e-arġhavānī kā nahīñ

kyuuñ hamāre dil meñ aa kar ārzūeñ phir ga.iiñ

ye sarā-e-huzn hai ghar shād-mānī kā nahīñ

aaj tū hī ai jigar sīḳh-e-nafas par ho kabāb

koī sāmāñ dard-e-dil kī mehmānī kā nahīñ

pā-barahna ho ke muusā aag lene ko baḌheñ

vādī-e-aiman hai ye sahrā shabānī kā nahīñ

rabt rakhnā ab hasīnoñ se hai 'kāmil' be-mahal

shor-o-shar ke din ga.e mausam javānī kā nahīñ

KHizr ke manind KHwahan zindagani ka nahin

ai ajal tishna main us dariya ke pani ka nahin

qaid ho kar lutf 'umr-e-jawedani ka nahin

haz tumhein ai KHizr apni zindagani ka nahin

mushtari koi yahan jins-e-ma'ani ka nahin

ek bhi gahak mata'-e-nukta-dani ka nahin

sin abhi kam hai na kholo ru-e-raushan se naqab

aaina surat-numa husn-e-jawani ka nahin

kyun utarta hai hamare qulzum-e-mawwaj mein

aashna ai dost tu bahr-e-ma'ani ka nahin

ek nazar surat dikha kar kijiye mujh se hijab

yun maza ai banda-parwar lan-tarani ka nahin

did-e-yusuf ka faqat talib hun ai bazar-e-misr

gham mujhe qimat ki arzani girani ka nahin

ba-ma'ani hai suKHan mera samajh kar is ko dekh

ye jarida ham-nashin arzhang-e-mani ka nahin

dard ko ham-rah kyun lata hai dil mein wo KHadang

kya saliqa KHud use rahat-risani ka nahin

dekh kar labrez-e-KHun kya mangte ho mujh se tum

dil hai ye saghar sharab-e-arghawani ka nahin

kyun hamare dil mein aa kar aarzuen phir gain

ye sara-e-huzn hai ghar shad-mani ka nahin

aaj tu hi ai jigar siKH-e-nafas par ho kabab

koi saman dard-e-dil ki mehmani ka nahin

pa-barahna ho ke musa aag lene ko baDhen

wadi-e-aiman hai ye sahra shabani ka nahin

rabt rakhna ab hasinon se hai 'kaamil' be-mahal

shor-o-shar ke din gae mausam jawani ka nahin