faza ne badal di zamane ki surat

fazā ne badal dī zamāne kī sūrat

qafas ban gayā āshiyāne kī sūrat

na yuuñ dil ko rote jo tum soch lete

jalāne se pahle bujhāne kī sūrat

habāb-e-ravāñ dekh kar dil pukārā

yahī thī hamāre fasāne kī sūrat

mujhe bhuul jaao maiñ ab us jagah huuñ

jahāñ se nahīñ koī aane kī sūrat

taḌaptī huī bijliyoñ meñ sahar tak

maiñ dekhā kiyā āshiyāne kī sūrat

qafas hī meñ sayyād phir aa gayā huuñ

chaman meñ na thī āb-o-dāne kī sūrat

'munīr'-e-shikasta kī āñkhoñ se pūchho

charāġh āñdhiyoñ meñ jalāne kī sūrat

faza ne badal di zamane ki surat

qafas ban gaya aashiyane ki surat

na yun dil ko rote jo tum soch lete

jalane se pahle bujhane ki surat

habab-e-rawan dekh kar dil pukara

yahi thi hamare fasane ki surat

mujhe bhul jao main ab us jagah hun

jahan se nahin koi aane ki surat

taDapti hui bijliyon mein sahar tak

main dekha kiya aashiyane ki surat

qafas hi mein sayyaad phir aa gaya hun

chaman mein na thi aab-o-dane ki surat

'munir'-e-shikasta ki aankhon se puchho

charagh aandhiyon mein jalane ki surat