mar miTe koi husul-e-kar ki tadbir mein

mar miTe koī husūl-e-kār kī tadbīr meñ

kārgar tadbīr kyā ho jab na ho taqdīr meñ

husn bhī hai dil-farebī bhī hai zebā.ī bhī hai

ek goyā.ī nahīñ hai yaar kī tasvīr meñ

raat bhar vo bhī rahe dard-e-jigar se be-qarār

ho asar itnā to mere nāla-e-shab-gīr meñ

qabr-e-tang-o-tār meñ jaane kī mun'im fikr kar

kyā dharā hai ūñche ūñche qasr kī tā'mīr meñ

de rahe haiñ aap mujh ko sadma-e-dard-e-firāq

kis ḳhatā kis jurm kis pādāsh kis taqsīr meñ

ye masal sach hai ki zālim phūltā phaltā nahīñ

hotī hai nashv-o-numā kab dāna-e-zanjīr meñ

dekhnā ik mubtalā-e-ġham kī hasrat dekhnā

dil hai kū-e-yār meñ aur paaoñ hai zanjīr meñ

ye lagāvaT ye kashish ye dil-farebī ye adā

aap se baḌh kar hai shoḳhī aap kī tasvīr meñ

zindagī ab tak to 'bismil' ‘aish-o-rāhat meñ kaTī

dekhiye likkhā hai kyā aage mirī taqdīr meñ

mar miTe koi husul-e-kar ki tadbir mein

kargar tadbir kya ho jab na ho taqdir mein

husn bhi hai dil-farebi bhi hai zebai bhi hai

ek goyai nahin hai yar ki taswir mein

raat bhar wo bhi rahe dard-e-jigar se be-qarar

ho asar itna to mere nala-e-shab-gir mein

qabr-e-tang-o-tar mein jaane ki mun'im fikr kar

kya dhara hai unche unche qasr ki ta'mir mein

de rahe hain aap mujh ko sadma-e-dard-e-firaq

kis KHata kis jurm kis padash kis taqsir mein

ye masal sach hai ki zalim phulta phalta nahin

hoti hai nashw-o-numa kab dana-e-zanjir mein

dekhna ek mubtala-e-gham ki hasrat dekhna

dil hai ku-e-yar mein aur paon hai zanjir mein

ye lagawaT ye kashish ye dil-farebi ye ada

aap se baDh kar hai shoKHi aap ki taswir mein

zindagi ab tak to 'bismil' ‘aish-o-rahat mein kaTi

dekhiye likkha hai kya aage meri taqdir mein