hasil-e-umr siwa maut ke jab kuchh bhi nahin

hāsil-e-'umr sivā maut ke jab kuchh bhī nahīñ

chaar din ke liye ye 'aish-o-tarab kuchh bhī nahīñ

vaj.h kyā tum se kahūñ is kī tabī'at hī to hai

dil ko ik josh hai rotā huuñ sabab kuchh bhī nahīñ

zindagī meñ to rahā karte the kyā kyā sāmāñ

qabr meñ bā'd-e-fanā aa.e to ab kuchh bhī nahīñ

na vo ahbāb na vo log na vo sham' na bazm

sub.h-dam vo asar-e-jalsa-e-shab kuchh bhī nahīñ

koī 'akbar' sā bhī dīvāna nazar aatā hai

pahroñ rotā hai jo pūchho to sabab kuchh bhī nahīñ

hasil-e-'umr siwa maut ke jab kuchh bhi nahin

chaar din ke liye ye 'aish-o-tarab kuchh bhi nahin

wajh kya tum se kahun is ki tabi'at hi to hai

dil ko ek josh hai rota hun sabab kuchh bhi nahin

zindagi mein to raha karte the kya kya saman

qabr mein ba'd-e-fana aae to ab kuchh bhi nahin

na wo ahbab na wo log na wo sham' na bazm

subh-dam wo asar-e-jalsa-e-shab kuchh bhi nahin

koi 'akbar' sa bhi diwana nazar aata hai

pahron rota hai jo puchho to sabab kuchh bhi nahin