jism bhi aankh ke pani se hara rahta tha

jism bhī aañkh ke paanī se harā rahtā thā

sar to vo sar thā ki zaanū pe paḌā rahtā thā

us ke bartāv se samjhā ki muqaddar meñ hai pyaas

nahr thā aur sarāboñ se ghirā rahtā thā

shīsha-e-shām-e-shikasta meñ shafaq phūTtī thī

raat bhar 'aks mirā ḳhuuñ meñ sanā rahtā thā

aañkh par aañkh paḌī rahtī thī aur phuul pe phuul

us ke hamrāh 'ajab baaġh sajā rahtā thā

āh-o-fariyād ke mausam bhī guzarte the magar

aisī bastī hī nahīñ thī ki ḳhudā rahtā thā

aap hī aap ulajh jaatī thiiñ bāteñ apnī

yā koī chor kahīñ dil meñ chhupā rahtā thā

maiñ ne daryāft kiyā ek hī shaḳhs aisā 'kumār'

maiñ na guzrūñ bhī to raste meñ bichhā rahtā thā

jism bhi aankh ke pani se hara rahta tha

sar to wo sar tha ki zanu pe paDa rahta tha

us ke bartaw se samjha ki muqaddar mein hai pyas

nahr tha aur sarabon se ghira rahta tha

shisha-e-sham-e-shikasta mein shafaq phuTti thi

raat bhar 'aks mera KHun mein sana rahta tha

aankh par aankh paDi rahti thi aur phul pe phul

us ke hamrah 'ajab bagh saja rahta tha

aah-o-fariyaad ke mausam bhi guzarte the magar

aisi basti hi nahin thi ki KHuda rahta tha

aap hi aap ulajh jati thin baaten apni

ya koi chor kahin dil mein chhupa rahta tha

main ne daryaft kiya ek hi shaKHs aisa 'kumar'

main na guzrun bhi to raste mein bichha rahta tha