har koi dil ki hatheli pe hai sahra rakkhe

har koī dil kī hathelī pe hai sahrā rakkhe

kis ko sairāb kare vo kise pyāsā rakkhe

umr bhar kaun nibhātā hai ta.alluq itnā

ai mirī jaan ke dushman tujhe allāh rakkhe

ham ko achchhā nahīñ lagtā koī hamnām tirā

koī tujh sā ho to phir naam bhī tujh sā rakkhe

dil bhī pāgal hai ki us shaḳhs se vābasta hai

jo kisī aur kā hone de na apnā rakkhe

kam nahīñ tama-e-ibādat bhī to hirs-e-zar se

faqr to vo hai ki jo diin na duniyā rakkhe

hañs na itnā bhī faqīroñ ke akele-pan par

jā ḳhudā merī tarah tujh ko bhī tanhā rakkhe

ye qanā.at hai itā.at hai ki chāhat hai 'farāz'

ham to raazī haiñ vo jis haal meñ jaisā rakkhe

har koi dil ki hatheli pe hai sahra rakkhe

kis ko sairab kare wo kise pyasa rakkhe

umr bhar kaun nibhata hai talluq itna

ai meri jaan ke dushman tujhe allah rakkhe

hum ko achchha nahin lagta koi hamnam tera

koi tujh sa ho to phir nam bhi tujh sa rakkhe

dil bhi pagal hai ki us shaKHs se wabasta hai

jo kisi aur ka hone de na apna rakkhe

kam nahin tama-e-ibaadat bhi to hirs-e-zar se

faqr to wo hai ki jo din na duniya rakkhe

hans na itna bhi faqiron ke akele-pan par

ja KHuda meri tarah tujh ko bhi tanha rakkhe

ye qanaat hai itaat hai ki chahat hai 'faraaz'

hum to raazi hain wo jis haal mein jaisa rakkhe