wo keh rahe hain ki unchi uDan band karen

vo keh rahe haiñ ki ūñchī uḌaan band kareñ

kahāñ kahāñ pe ham apnī zabān band kareñ

vo ā.inoñ ke ḳharīdār ban ke aa.e haiñ

hameñ hai hukm ki apnī dukān band kareñ

yahāñ lagān-vasūlī bhī ab sharī'at hai

ye marne jiine kī bāteñ kisān band kareñ

vo ek shor jo har pal sunā.ī detā hai

tumhī batāo ki ham apne kaan band kareñ

hameñ ḳhabar hai ye kashtī ubhar na pā.egī

huzūr aap ye jhūTe bayān band kareñ

shikār DhūñDnā ab un ke bas kī baat nahīñ

'suhail' un se ye keh do machān band kareñ

wo keh rahe hain ki unchi uDan band karen

kahan kahan pe hum apni zaban band karen

wo aainon ke KHaridar ban ke aae hain

hamein hai hukm ki apni dukan band karen

yahan lagan-wasuli bhi ab shari'at hai

ye marne jine ki baaten kisan band karen

wo ek shor jo har pal sunai deta hai

tumhi batao ki hum apne kan band karen

hamein KHabar hai ye kashti ubhar na paegi

huzur aap ye jhuTe bayan band karen

shikar DhunDna ab un ke bas ki baat nahin

'suhail' un se ye keh do machan band karen