jazbe ko zaban de raha hun

jazbe ko zabān de rahā huuñ

patthar ko bhī jaan de rahā huuñ

ik yaad ko dafn kar ke dil meñ

dushman ko amaan de rahā huuñ

munsif kā mizāj jāntā huuñ

be-sūd bayān de rahā huuñ

chehre pe sajā ke ḳhuun apnā

qātil kā nishān de rahā huuñ

fasloñ ko to bārishoñ ne luuTā

miTTī kā lagān de rahā huuñ

bahrūp badal ke āñdhiyoñ kā

tinkoñ ko uḌaan de rahā huuñ

is shahr meñ she'r keh ke 'mohsin'

sahrā meñ azaan de rahā huuñ

jazbe ko zaban de raha hun

patthar ko bhi jaan de raha hun

ek yaad ko dafn kar ke dil mein

dushman ko aman de raha hun

munsif ka mizaj jaanta hun

be-sud bayan de raha hun

chehre pe saja ke KHun apna

qatil ka nishan de raha hun

faslon ko to barishon ne luTa

miTTi ka lagan de raha hun

bahrup badal ke aandhiyon ka

tinkon ko uDan de raha hun

is shahr mein she'r keh ke 'mohsin'

sahra mein azan de raha hun