jahan tum ho rashk-e-gulistan paDa hai

jahāñ tum ho rashk-e-gulistāñ paḌā hai

jahāñ ham haiñ dasht-o-bayābāñ paḌā hai

yahāñ tīrgī hai vahāñ raushnī hai

'ajab ik tazād-e-numāyāñ paḌā hai

vo josh-e-bahārāñ vo abr-e-guhar-bār

sabhī kuchh pas-e-chashm-e-giryāñ paḌā hai

tire qasr meñ har taraf hai charāġhāñ

mire ghar meñ fāqoñ kā sāmāñ paḌā hai

hai ḳhush tū ki terā mahal hai salāmat

idhar shahr kā shahr vīrāñ paḌā hai

matā'-e-nazar kyā hai ik ḳhvāb-e-fardā

vahī ḳhvāb āñkhoñ meñ larzāñ paḌā hai

umīdoñ ke lāshe Thikāne lagāo

ki raste meñ shahr-e-ḳhamoshāñ paḌā hai

hai āshob-e-dil yā hai vahshat hamārī

ki insāñ se insāñ gurezāñ paḌā hai

jahan tum ho rashk-e-gulistan paDa hai

jahan hum hain dasht-o-bayaban paDa hai

yahan tirgi hai wahan raushni hai

'ajab ek tazad-e-numayan paDa hai

wo josh-e-bahaaran wo abr-e-guhar-bar

sabhi kuchh pas-e-chashm-e-giryan paDa hai

tere qasr mein har taraf hai charaghan

mere ghar mein faqon ka saman paDa hai

hai KHush tu ki tera mahal hai salamat

idhar shahr ka shahr viran paDa hai

mata'-e-nazar kya hai ek KHwab-e-farda

wahi KHwab aankhon mein larzan paDa hai

umidon ke lashe Thikane lagao

ki raste mein shahr-e-KHamoshan paDa hai

hai aashob-e-dil ya hai wahshat hamari

ki insan se insan gurezan paDa hai