guftugu kam ho to meyar KHafa hote hain

guftugū kam ho to me'yār ḳhafā hote haiñ

bātoñ bātoñ pe mire yaar ḳhafā hote haiñ

itne yāroñ ko bhalā kaise koī ḳhush rakkhe

ek raazī ho to do chaar ḳhafā hote haiñ

be-irāda jo kabhī ghar se nikalte haiñ kahīñ

ham se ghar ke dar-o-dīvār ḳhafā hote haiñ

un ko har roz manātā huuñ ka.ī baar ki vo

mujh se ik din meñ ka.ī baar ḳhafā hote haiñ

kar diyā kis ne parindoñ ke Thikānoñ kā ye haal

ghoñsle dekh ke ashjār ḳhafā hote haiñ

gaañv ke log agar faisle ḳhud karne lageñ

un se phir gaañv ke sardār ḳhafā hote haiñ

zikr to ham ne zamāne kī vafā kā chheḌā

aap kis baat pe sarkār ḳhafā hote haiñ

is liye bhī yahāñ ḳhāmosh paḌā rahtā huuñ

ġham batā.ūñ to ye ġham-ḳhvār ḳhafā hote haiñ

hāl-e-dil ham ko sunāne se gurezāñ bhī haiñ

ham na pūchheñ to ye bīmār ḳhafā hote haiñ

nekī is shart pe karte haiñ ki tasvīr bane

gar koī roke to sarkār ḳhafā hote haiñ

nuqs tā'mīr meñ jab koī nikāle 'faisal'

zāhirī baat hai me'mār ḳhafā hote haiñ

guftugu kam ho to me'yar KHafa hote hain

baaton baaton pe mere yar KHafa hote hain

itne yaron ko bhala kaise koi KHush rakkhe

ek raazi ho to do chaar KHafa hote hain

be-irada jo kabhi ghar se nikalte hain kahin

hum se ghar ke dar-o-diwar KHafa hote hain

un ko har roz manata hun kai bar ki wo

mujh se ek din mein kai bar KHafa hote hain

kar diya kis ne parindon ke Thikanon ka ye haal

ghonsle dekh ke ashjar KHafa hote hain

ganw ke log agar faisle KHud karne lagen

un se phir ganw ke sardar KHafa hote hain

zikr to hum ne zamane ki wafa ka chheDa

aap kis baat pe sarkar KHafa hote hain

is liye bhi yahan KHamosh paDa rahta hun

gham bataun to ye gham-KHwar KHafa hote hain

haal-e-dil hum ko sunane se gurezan bhi hain

hum na puchhen to ye bimar KHafa hote hain

neki is shart pe karte hain ki taswir bane

gar koi roke to sarkar KHafa hote hain

nuqs ta'mir mein jab koi nikale 'faisal'

zahiri baat hai me'mar KHafa hote hain