dast-e-awam ho ki gareban-e-shahryar

dast-e-'avām ho ki garebān-e-shahryār

is daur-e-nā-sipās meñ donoñ haiñ be-vaqār

vo shor hai ki giit ubhartā nahīñ koī

yuuñ saaz baj rahe haiñ ki ghāyal hai tār-tār

aa.ī nazar 'ufuq pe shafaq sī khilī huī

dekhā to paḌ rahī thī vahāñ ḳhuun kī phuvār

kāñToñ se kyā shikāyat-e-begāngī kareñ

phūloñ ne ḳhud hī khol diyā rāz-e-nau-bahār

ab duur tak nahīñ kisī aahaT kī naġhmagī

māyūs ho chalī hai mirī shām-e-intizār

sar par jo aa paḌī hai to hañs kar nibhā.iye

hālāt par nahīñ hai kisī kā bhī iḳhtiyār

khāte haiñ vo fareb mohabbat ke naam par

ab apne aap par bhī nahīñ tum ko e'tibār

tū ne diyā fareb to maiñ bhī rahā ḳhamosh

ai dost maiñ bhī terī tarah huuñ gunāhgār

shāyad kuchh aur bhī maiñ tirā saath de sakūñ

ai zindagī kabhī to palaT kar mujhe pukār

koī kisī kī baat samajhtā nahīñ 'qatīl'

mujh ko isī liye to hai dīvāngī se pyaar

dast-e-'awam ho ki gareban-e-shahryar

is daur-e-na-sipas mein donon hain be-waqar

wo shor hai ki git ubharta nahin koi

yun saz baj rahe hain ki ghayal hai tar-tar

aai nazar 'ufuq pe shafaq si khili hui

dekha to paD rahi thi wahan KHun ki phuwar

kanTon se kya shikayat-e-begangi karen

phulon ne KHud hi khol diya raaz-e-nau-bahaar

ab dur tak nahin kisi aahaT ki naghmagi

mayus ho chali hai meri sham-e-intizar

sar par jo aa paDi hai to hans kar nibhaiye

haalat par nahin hai kisi ka bhi iKHtiyar

khate hain wo fareb mohabbat ke nam par

ab apne aap par bhi nahin tum ko e'tibar

tu ne diya fareb to main bhi raha KHamosh

ai dost main bhi teri tarah hun gunahgar

shayad kuchh aur bhi main tera sath de sakun

ai zindagi kabhi to palaT kar mujhe pukar

koi kisi ki baat samajhta nahin 'qatil'

mujh ko isi liye to hai diwangi se pyar