kuchh is tarah se tera sath mujhko hasil hai

kuchh is tarah se tirā saath mujh ko hāsil hai

siyāh raat meñ jaise ki nuur shāmil hai

tirī jhalak se milī hai nazar ko rā'nā.ī

vagarna dasht kahāñ dekhne ke qābil hai

bikhar rahī hai fazāoñ meñ phuul kī ḳhushbū

'ajab hai phuul ki apne asar se ġhāfil hai

yahāñ koī bhī nahīñ duur tak nigāhoñ meñ

ye dahr hai ki kisī ajnabī kī mahfil hai

chalā gayā hai musavvir banā ke bas ḳhāka

kahā ye shakl binā rang-o-bū ke kāmil hai

maiñ raah apnī badal ke to chal paḌā lekin

ye kyā ġhazab hai ki tū har jagah muqābil hai

kuchh is tarah se tera sath mujh ko hasil hai

siyah raat mein jaise ki nur shamil hai

teri jhalak se mili hai nazar ko ra'nai

wagarna dasht kahan dekhne ke qabil hai

bikhar rahi hai fazaon mein phul ki KHushbu

'ajab hai phul ki apne asar se ghafil hai

yahan koi bhi nahin dur tak nigahon mein

ye dahr hai ki kisi ajnabi ki mahfil hai

chala gaya hai musawwir bana ke bas KHaka

kaha ye shakl bina rang-o-bu ke kaamil hai

main rah apni badal ke to chal paDa lekin

ye kya ghazab hai ki tu har jagah muqabil hai