mana ki musafir hain jahan-e-guzaran hum

maanā ki musāfir haiñ jahān-e-guzarāñ ham

mā'lūm to ho ham ko ki āḳhir haiñ kahāñ ham

kyā koī jahannam thā pas-e-parda-e-afkār

ik lams-e-gurezāñ se hue sho'la-ba-jāñ ham

duniyā ho koī ḳhvāb ki afsāna ho lekin

ye ham ko yaqīñ hai ki nahīñ vahm-o-gumāñ ham

is vaz' se jiinā koī āsān nahīñ thā

guzre na kisī taur kisī par bhī girāñ ham

ai raushnī-e-fikr-o-nazar terī badaulat

sūraj na sahī phir bhī haiñ 'ālam pe 'ayāñ ham

duniyā ko bhī dekheñge jo fursat huī ham ko

filhāl to haiñ apnī hī jānib nigarāñ ham

ye dard kī ne'mat jo mayassar hai na hotī

rahte jo jahāñ meñ sifat-e-ahl-e-jahāñ ham

ai 'ishq jo hogā tirī 'azmat ke munāfī

apnā.eñge bhūle se na vo tarz-e-bayāñ ham

likhte haiñ vahī she'r nikaltā hai jo dil se

dohrāte nahīñ 'lais' hadīs-e-digarāñ ham

mana ki musafir hain jahan-e-guzaran hum

ma'lum to ho hum ko ki aaKHir hain kahan hum

kya koi jahannam tha pas-e-parda-e-afkar

ek lams-e-gurezan se hue sho'la-ba-jaan hum

duniya ho koi KHwab ki afsana ho lekin

ye hum ko yaqin hai ki nahin wahm-o-guman hum

is waz' se jina koi aasan nahin tha

guzre na kisi taur kisi par bhi giran hum

ai raushni-e-fikr-o-nazar teri badaulat

suraj na sahi phir bhi hain 'alam pe 'ayan hum

duniya ko bhi dekhenge jo fursat hui hum ko

filhaal to hain apni hi jaanib nigaran hum

ye dard ki ne'mat jo mayassar hai na hoti

rahte jo jahan mein sifat-e-ahl-e-jahan hum

ai 'ishq jo hoga teri 'azmat ke munafi

apnaenge bhule se na wo tarz-e-bayan hum

likhte hain wahi she'r nikalta hai jo dil se

dohraate nahin 'lais' hadis-e-digaran hum