ajab ek parda hael hai jo sarkaya nahin jata

'ajab ik parda haa.el hai jo sarkāyā nahīñ jaatā

bahut sīdhī sī bātoñ ko bhī samjhāyā nahīñ jaatā

kabhī ye naaz thā ḳhud par ki mīr-e-kārvāñ ham haiñ

luTe phir qāfile aise ki itrāyā nahīñ jaatā

bahut vā'de hue ham se mudāvā lāzmī hogā

magar hai vaqt aisā qarz lauTāyā nahīñ jaatā

bahāreñ jab nahīñ apnī to phir kyā aarzū rakhnā

ye gulshan māñge kī ḳhushbū se mahkāyā nahīñ jaatā

na-jāne kyuuñ sabhī rishte hue jaate haiñ ab lāġhar

ki duurī do qadam kī ho magar aayā nahīñ jaatā

kisī se mashvara kaisā kisī se pūchhnā kyā ab

mohabbat hai hunar aisā jo batlāyā nahīñ jaatā

mire sayyād se keh do nahīñ ab lauTnā mumkin

samundar meñ gire qatre ko phir paayā nahīñ jaatā

ab aage DhūñDte ho kyā mujhe tum is kahānī meñ

maiñ huuñ kirdār jo anjām tak laayā nahīñ jaatā

kaheñge kyā mujhe apne kahegā ye zamāna kyā

ho 'abrak' sach agar likhnā to ghabrāyā nahīñ jaatā

'ajab ek parda hael hai jo sarkaya nahin jata

bahut sidhi si baaton ko bhi samjhaya nahin jata

kabhi ye naz tha KHud par ki mir-e-karwan hum hain

luTe phir qafile aise ki itraya nahin jata

bahut wa'de hue hum se mudawa lazmi hoga

magar hai waqt aisa qarz lauTaya nahin jata

bahaaren jab nahin apni to phir kya aarzu rakhna

ye gulshan mange ki KHushbu se mahkaya nahin jata

na-jaane kyun sabhi rishte hue jate hain ab laghar

ki duri do qadam ki ho magar aaya nahin jata

kisi se mashwara kaisa kisi se puchhna kya ab

mohabbat hai hunar aisa jo batlaya nahin jata

mere sayyaad se keh do nahin ab lauTna mumkin

samundar mein gire qatre ko phir paya nahin jata

ab aage DhunDte ho kya mujhe tum is kahani mein

main hun kirdar jo anjam tak laya nahin jata

kahenge kya mujhe apne kahega ye zamana kya

ho 'abrak' sach agar likhna to ghabraya nahin jata