kisi ka dard-e-dil pyare tumhaara naz kya samjhe
kisī kā dard-e-dil pyāre tumhārā naaz kyā samjhe
jo guzre said ke jī par use shahbāz kyā samjhe
rihā karnā hameñ sayyād ab pāmāl karnā hai
phaḌaknā bhī jise bhūlā ho so parvāz kyā samjhe
na pūchho mujh se merā haal Tuk duniyā meñ jiine do
ḳhudā jaane maiñ kyā bolūñ koī ġhammāz kyā samjhe
jo guzrī raat mere par kise mā'lūm ho tujh bin
dil-e-parvāna kā juz sham' koī raaz kyā samjhe
na paḌhiyo ye ġhazal 'saudā' tū hargiz 'mīr' ke aage
vo in tarzoñ se kyā vāqif vo ye andāz kyā samjhe
kisi ka dard-e-dil pyare tumhaara naz kya samjhe
jo guzre said ke ji par use shahbaz kya samjhe
riha karna hamein sayyaad ab pamal karna hai
phaDakna bhi jise bhula ho so parwaz kya samjhe
na puchho mujh se mera haal Tuk duniya mein jine do
KHuda jaane main kya bolun koi ghammaz kya samjhe
jo guzri raat mere par kise ma'lum ho tujh bin
dil-e-parwana ka juz sham' koi raaz kya samjhe
na paDhiyo ye ghazal 'sauda' tu hargiz 'mir' ke aage
wo in tarzon se kya waqif wo ye andaz kya samjhe
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
