parde parde mein bahut mujh pe tere war chale

parde parde meñ bahut mujh pe tire vaar chale

saaf ab halq pe ḳhanjar chale talvār chale

dūri-e-manzil-e-maqsad koī ham se pūchhe

baiThe sau baar ham us raah meñ sau baar chale

kaun pāmāl huā us kī balā dekhtī hai

dekhtā apnī hī jo shoḳhi-e-raftār chale

be-piye chaltā hai yuuñ jhuum ke vo mast-e-shabāb

jis tarah pī ke koī rind-e-qadah-ḳhvār chale

chashm o abrū kī ye sāzish jigar o dil ko naved

ek kā tiir chale ek kī talvār chale

kuchh is andāz se sayyād ne āzād kiyā

jo chale chhuT ke qafas se vo giraftār chale

jis ko rahnā ho rahe qaidi-e-zindāñ ho kar

ham to ai ham-nafaso phāñd ke dīvār chale

phir 'mubārak' vahī ghanghor ghaTā.eñ aa.iiñ

jānib-e-mai-kada phir rind-e-qadah-ḳhvār chale

parde parde mein bahut mujh pe tere war chale

saf ab halq pe KHanjar chale talwar chale

duri-e-manzil-e-maqsad koi hum se puchhe

baiThe sau bar hum us rah mein sau bar chale

kaun pamal hua us ki bala dekhti hai

dekhta apni hi jo shoKHi-e-raftar chale

be-piye chalta hai yun jhum ke wo mast-e-shabab

jis tarah pi ke koi rind-e-qadah-KHwar chale

chashm o abru ki ye sazish jigar o dil ko nawed

ek ka tir chale ek ki talwar chale

kuchh is andaz se sayyaad ne aazad kiya

jo chale chhuT ke qafas se wo giraftar chale

jis ko rahna ho rahe qaidi-e-zindan ho kar

hum to ai ham-nafaso phand ke diwar chale

phir 'mubarak' wahi ghanghor ghaTaen aain

jaanib-e-mai-kada phir rind-e-qadah-KHwar chale