paya-e-KHisht-o-KHazaf aur guhar se uncha

pāya-e-ḳhisht-o-ḳhazaf aur guhar se ūñchā

qad yahāñ be-hunarī kā hai hunar se ūñchā

ek din ġharq na kar de tujhe ye sail-e-vajūd

dekh ho jaa.e na paanī kahīñ sar se ūñchā

māñgtā kis se mujhe sañg-e-sar-afrāzī de

koī darvāza to hotā tire dar se ūñchā

ham-qadam hai tapish-e-jāñ to pahuñch jā.ūñgā

ek do jast meñ dīvār-e-shajar se ūñchā

ek bigḌī huī tamsīl haiñ saare chehre

koī manzar nahīñ meyār-e-nazar se ūñchā

dhuup utrī to simaTnā paḌā ḳhud meñ us ko

ek saaya ki jo thā apne shajar se ūñchā

bulbula uThne ko uTThā to magar bechāra

rakh sakā ḳhud ko na dariyā ke bhañvar se ūñchā

kaisī pastī meñ ye duniyā ne basāyā hai mujhe

nazar aatā hai har ik ghar mire ghar se ūñchā

vo kahāñ se ye taḳhayyul ke ufuq lā.egā

āsmāñ ab bhī nahīñ hai mire sar se ūñchā

ḳhāk-e-'shiblī' se ḳhamīr apnā bhī uTThā hai 'fazā'

naam urdu kā huā hai isī ghar se ūñchā

paya-e-KHisht-o-KHazaf aur guhar se uncha

qad yahan be-hunari ka hai hunar se uncha

ek din gharq na kar de tujhe ye sail-e-wajud

dekh ho jae na pani kahin sar se uncha

mangta kis se mujhe sang-e-sar-afraazi de

koi darwaza to hota tere dar se uncha

ham-qadam hai tapish-e-jaan to pahunch jaunga

ek do jast mein diwar-e-shajar se uncha

ek bigDi hui tamsil hain sare chehre

koi manzar nahin meyar-e-nazar se uncha

dhup utri to simaTna paDa KHud mein us ko

ek saya ki jo tha apne shajar se uncha

bulbula uThne ko uTTha to magar bechaara

rakh saka KHud ko na dariya ke bhanwar se uncha

kaisi pasti mein ye duniya ne basaya hai mujhe

nazar aata hai har ek ghar mere ghar se uncha

wo kahan se ye taKHayyul ke ufuq laega

aasman ab bhi nahin hai mere sar se uncha

KHak-e-'shibli' se KHamir apna bhi uTTha hai 'faza'

nam urdu ka hua hai isi ghar se uncha