jis ki saundhi saundhi KHushbu aangan aangan palti thi

jis kī sauñdhī sauñdhī ḳhushbū āñgan āñgan paltī thī

us miTTī kā bojh uThāte jism kī miTTī galtī thī

jis ko taap ke garm lihāfoñ meñ bachche so jaate the

dil ke chūlhe meñ har dam vo aag barābar jaltī thī

garm do-pahroñ meñ jalte sehnoñ meñ jhāḌū dete the

jin būḌhe hāthoñ se pak kar roTī phuul meñ Dhaltī thī

kisī kahānī meñ vīrānī meñ jab dil ghabrātā thā

kisī aziiz duā kī ḳhushbū saath hamāre chaltī thī

gard uḌāte zard bagūle dar par dastak dete the

aur ḳhasta-dīvāroñ kī pal bhar meñ shakl badaltī thī

ḳhushk khajūr ke pattoñ se jab niind kā bistar sajtā thā

ḳhvāb-nagar kī shahzādī galiyoñ meñ aan nikaltī thī

din aatā thā aur siine meñ shaam kā ḳhāka bantā thā

shaam aatī thī aur jismoñ meñ shaam bhī āḳhir Dhaltī thī

jis ki saundhi saundhi KHushbu aangan aangan palti thi

us miTTi ka bojh uThate jism ki miTTi galti thi

jis ko tap ke garm lihafon mein bachche so jate the

dil ke chulhe mein har dam wo aag barabar jalti thi

garm do-pahron mein jalte sehnon mein jhaDu dete the

jin buDhe hathon se pak kar roTi phul mein Dhalti thi

kisi kahani mein virani mein jab dil ghabraata tha

kisi aziz dua ki KHushbu sath hamare chalti thi

gard uDate zard bagule dar par dastak dete the

aur KHasta-diwaron ki pal bhar mein shakl badalti thi

KHushk khajur ke patton se jab nind ka bistar sajta tha

KHwab-nagar ki shahzadi galiyon mein aan nikalti thi

din aata tha aur sine mein sham ka KHaka banta tha

sham aati thi aur jismon mein sham bhi aaKHir Dhalti thi