nikal ke halqa-e-sham-o-sahar se jaen kahin

nikal ke halqa-e-shām-o-sahar se jaa.eñ kahīñ

zamīñ ke saath na mil jaa.eñ ye ḳhalā.eñ kahīñ

safar kī raat hai pichhlī kahāniyāñ na kaho

rutoñ ke saath palaTtī haiñ kab havā.eñ kahīñ

fazā meñ tairte rahte haiñ naqsh se kyā kyā

mujhe talāsh na kartī hoñ ye balā.eñ kahīñ

havā hai tez charāġh-e-vafā kā zikr to kyā

tanābeñ ḳhema-e-jāñ kī na TuuT jaa.eñ kahīñ

maiñ os ban ke gul-e-harf par chamaktā huuñ

nikalne vaalā hai sūraj mujhe chhupā.eñ kahīñ

mire vajūd pe utrī haiñ lafz kī sūrat

bhaTak rahī thiiñ ḳhalāoñ meñ ye sadā.eñ kahīñ

havā kā lams hai paañv meñ beḌiyoñ kī tarah

shafaq kī aañch se āñkheñ pighal na jaa.eñ kahīñ

rukā huā hai sitāroñ kā kārvāñ 'amjad'

charāġh apne lahū se hī ab jalā.eñ kahīñ

nikal ke halqa-e-sham-o-sahar se jaen kahin

zamin ke sath na mil jaen ye KHalaen kahin

safar ki raat hai pichhli kahaniyan na kaho

ruton ke sath palaTti hain kab hawaen kahin

faza mein tairte rahte hain naqsh se kya kya

mujhe talash na karti hon ye balaen kahin

hawa hai tez charagh-e-wafa ka zikr to kya

tanaben KHema-e-jaan ki na TuT jaen kahin

main os ban ke gul-e-harf par chamakta hun

nikalne wala hai suraj mujhe chhupaen kahin

mere wajud pe utri hain lafz ki surat

bhaTak rahi thin KHalaon mein ye sadaen kahin

hawa ka lams hai panw mein beDiyon ki tarah

shafaq ki aanch se aankhen pighal na jaen kahin

ruka hua hai sitaron ka karwan 'amjad'

charagh apne lahu se hi ab jalaen kahin