nigahen jhuk gain aaya shabab aahista aahista

nigāheñ jhuk ga.iiñ aayā shabāb āhista āhista

paḌā āñkhoñ pa palkoñ kā hijāb āhista āhista

savālī ban ke jab mushtāq nazreñ paḌ ga.iiñ un par

nigāhoñ ne diyā un kī javāb āhista āhista

kabhī ashkoñ ke tūfāñ meñ kabhī mizhgāñ se dāmāñ meñ

lahū kā dil bahā yuuñ be-hisāb āhista āhista

isī ummīd par to jī rahe haiñ hijr ke maare

kabhī to ruḳh se uTThegī naqāb āhista āhista

ḳhayāloñ se ruḳh-e-zebā jo aksar dekh letā hai

miTā jaatā hai vo bhī kaif-e-ḳhvāb āhista āhista

ruḳh-e-zebā pe lahreñ letī haiñ kuchh is tarah zulfeñ

ki jaise chāñd par chhā.e sahāb āhista āhista

matā-e-zindagī samjhā thā soz-e-ġham ko maiñ 'hāshim'

miTā jaanā hai vo bhī iztirāb āhista āhista

nigahen jhuk gain aaya shabab aahista aahista

paDa aankhon pa palkon ka hijab aahista aahista

sawali ban ke jab mushtaq nazren paD gain un par

nigahon ne diya un ki jawab aahista aahista

kabhi ashkon ke tufan mein kabhi mizhgan se daman mein

lahu ka dil baha yun be-hisab aahista aahista

isi ummid par to ji rahe hain hijr ke mare

kabhi to ruKH se uTThegi naqab aahista aahista

KHayalon se ruKH-e-zeba jo aksar dekh leta hai

miTa jata hai wo bhi kaif-e-KHwab aahista aahista

ruKH-e-zeba pe lahren leti hain kuchh is tarah zulfen

ki jaise chand par chhae sahab aahista aahista

mata-e-zindagi samjha tha soz-e-gham ko main 'hashim'

miTa jaana hai wo bhi iztirab aahista aahista