na zulf-e-sham na ru-e-sahar ko dekhte hain

na zulf-e-shām na rū-e-sahar ko dekhte haiñ

ham ahl-e-shauq tumhārī nazar ko dekhte haiñ

hujūm-e-rahmat-e-parvardigār kyā kahiye

maqām-e-'azmat-e-dāmān-e-tar ko dekhte haiñ

haiñ nau-asīr gumān-o-yaqīñ ke phande meñ

kabhī qafas ko kabhī bāl-o-par ko dekhte haiñ

ab ahl-e-hosh pe TuuTe haiñ hairatoñ ke pahāḌ

mire junūn-e-vafā ke asar ko dekhte haiñ

qadam qadam pe nazar aa ga.ī hameñ manzil

vo aur log haiñ jo rahguzar ko dekhte haiñ

na zulf-e-sham na ru-e-sahar ko dekhte hain

hum ahl-e-shauq tumhaari nazar ko dekhte hain

hujum-e-rahmat-e-parwardigar kya kahiye

maqam-e-'azmat-e-daman-e-tar ko dekhte hain

hain nau-asir guman-o-yaqin ke phande mein

kabhi qafas ko kabhi baal-o-par ko dekhte hain

ab ahl-e-hosh pe TuTe hain hairaton ke pahaD

mere junun-e-wafa ke asar ko dekhte hain

qadam qadam pe nazar aa gai hamein manzil

wo aur log hain jo rahguzar ko dekhte hain