mariz-e-ishq dil-e-zar ki panah mein hai

marīz-e-'ishq dil-e-zār kī panāh meñ hai

ki us ke dard kā darmāñ tirī nigāh meñ hai

karūñ to shahr-e-tamannā se kis tarah hijrat

ki us kī yaad kī dīvār merī raah meñ hai

vo husn-e-tarz na mil pā.egā kitāboñ meñ

jo rang apne adīboñ kī bārgāh meñ hai

ye zabt kā hai asar lab pe ek harf nahīñ

ki dard jo bhī hai apnā vo dil kī aah meñ hai

maiñ ḳhud hī rah gayā 'rāvī' añdheroñ meñ jabki

mirī hayāt kā har rang us kī chaah meñ hai

mariz-e-'ishq dil-e-zar ki panah mein hai

ki us ke dard ka darman teri nigah mein hai

karun to shahr-e-tamanna se kis tarah hijrat

ki us ki yaad ki diwar meri rah mein hai

wo husn-e-tarz na mil paega kitabon mein

jo rang apne adibon ki bargah mein hai

ye zabt ka hai asar lab pe ek harf nahin

ki dard jo bhi hai apna wo dil ki aah mein hai

main KHud hi rah gaya 'rawi' andheron mein jabki

meri hayat ka har rang us ki chah mein hai