nigah-e-naz ka ek war kar ke chhoD diya

nigāh-e-nāz kā ik vaar kar ke chhoḌ diyā

dil-e-harīf ko bedār kar ke chhoḌ diyā

huī to hai yūñhī tardīd-e-ahd-e-lutf-o-karam

dabī zabān se iqrār kar ke chhoḌ diyā

chhupe kuchh aise ki tā-zīst phir na aa.e nazar

rahīn-e-hasrat-e-dīdār kar ke chhoḌ diyā

mujhe to qaid-e-mohabbat aziiz thī lekin

kisī ne mujh ko giraftār kar ke chhoḌ diyā

nazar ko jur.at-e-takmīl-e-bandagī na huī

tavāf-e-kūcha-e-dil-dār kar ke chhoḌ diyā

ḳhushā vo kashmakash-e-rabt-e-bāhamī jis ne

dil o dimāġh ko be-kār kar ke chhoḌ diyā

zahe-nasīb ki duniyā ne tere ġham ne mujhe

masarratoñ kā talabgār kar ke chhoḌ diyā

karam kī aas meñ ab kis ke dar pe jaa.e 'shakīl'

jab aap hī ne gunahgār kar ke chhoḌ diyā

nigah-e-naz ka ek war kar ke chhoD diya

dil-e-harif ko bedar kar ke chhoD diya

hui to hai yunhi tardid-e-ahd-e-lutf-o-karam

dabi zaban se iqrar kar ke chhoD diya

chhupe kuchh aise ki ta-zist phir na aae nazar

rahin-e-hasrat-e-didar kar ke chhoD diya

mujhe to qaid-e-mohabbat aziz thi lekin

kisi ne mujh ko giraftar kar ke chhoD diya

nazar ko jurat-e-takmil-e-bandagi na hui

tawaf-e-kucha-e-dil-dar kar ke chhoD diya

KHusha wo kashmakash-e-rabt-e-bahami jis ne

dil o dimagh ko be-kar kar ke chhoD diya

zahe-nasib ki duniya ne tere gham ne mujhe

masarraton ka talabgar kar ke chhoD diya

karam ki aas mein ab kis ke dar pe jae 'shakil'

jab aap hi ne gunahgar kar ke chhoD diya