sar-ba-zanu hain ki yun hi raat bhar rahte hain hum

sar-ba-zānū haiñ ki yuuñ hī raat bhar rahte haiñ ham

phail jaatī hai zamīñ aur muḳhtasar rahte haiñ ham

bhāgtā huuñ ‘ālam-e-idrāk se maiñ mujh se dil

haañ ḳhabar aatī hai lekin be-ḳhabar rahte haiñ ham

ik diyā jaltā hai tāqoñ meñ numā.ish ke liye

ek ā.īna hai jis meñ mushtahar rahte haiñ ham

sub.h tak bistar meñ baaqī ik shikan rahtā hai vo

shaam tak daftar meñ ḳhālī niiñd bhar rahte haiñ ham

kaT rahe haiñ ug rahe haiñ mausamoñ ke saath saath

koī yug koī sadī ho vaqt par rahte haiñ ham

raat bhar uTh uTh ke paanī DhūñDte haiñ sāhibo

ek tishna ḳhvāb ke zer-e-asar rahte haiñ ham

vaqt dikhlā.egā yā ġhazleñ batā.eñgī 'kumār'

kis qadar miT jā.eñge aur kis qadar rahte haiñ ham

sar-ba-zanu hain ki yun hi raat bhar rahte hain hum

phail jati hai zamin aur muKHtasar rahte hain hum

bhagta hun ‘alam-e-idrak se main mujh se dil

han KHabar aati hai lekin be-KHabar rahte hain hum

ek diya jalta hai taqon mein numaish ke liye

ek aaina hai jis mein mushtahar rahte hain hum

subh tak bistar mein baqi ek shikan rahta hai wo

sham tak daftar mein KHali nind bhar rahte hain hum

kaT rahe hain ug rahe hain mausamon ke sath sath

koi yug koi sadi ho waqt par rahte hain hum

raat bhar uTh uTh ke pani DhunDte hain sahibo

ek tishna KHwab ke zer-e-asar rahte hain hum

waqt dikhlaega ya ghazlen bataengi 'kumar'

kis qadar miT jaenge aur kis qadar rahte hain hum