aaj unhen kuchh is tarah ji khol kar dekha kiye

aaj unheñ kuchh is tarah jī khol kar dekhā kiye

ek hī lamhe meñ jaise umr-bhar dekhā kiye

dil agar betāb hai dil kā muqaddar hai yahī

jis qadar thī ham ko taufīq-e-nazar dekhā kiye

ḳhud-faroshāna adā thī merī sūrat dekhnā

apne hī jalve ba-andāz-e-digar dekhā kiye

nā-shanās-e-ġham faqat dād-e-hunar dete rahe

ham matā-e-ġham ko rusva-e-hunar dekhā kiye

dekhne kā ab ye aalam hai koī ho yā na ho

ham jidhar dekhā kiye pahroñ udhar dekhā kiye

husn ko dekhā hai maiñ ne husn kī ḳhātir 'hafīz'

varna sab apnā hī meyār-e-nazar dekhā kiye

aaj unhen kuchh is tarah ji khol kar dekha kiye

ek hi lamhe mein jaise umr-bhar dekha kiye

dil agar betab hai dil ka muqaddar hai yahi

jis qadar thi hum ko taufiq-e-nazar dekha kiye

KHud-faroshana ada thi meri surat dekhna

apne hi jalwe ba-andaz-e-digar dekha kiye

na-shanas-e-gham faqat dad-e-hunar dete rahe

hum mata-e-gham ko ruswa-e-hunar dekha kiye

dekhne ka ab ye aalam hai koi ho ya na ho

hum jidhar dekha kiye pahron udhar dekha kiye

husn ko dekha hai main ne husn ki KHatir 'hafiz'

warna sab apna hi meyar-e-nazar dekha kiye