naya ek rishta paida kyun karen hum

nayā ik rishta paidā kyuuñ kareñ ham

bichhaḌnā hai to jhagḌā kyuuñ kareñ ham

ḳhamoshī se adā ho rasm-e-dūrī

koī hangāma barpā kyuuñ kareñ ham

ye kaafī hai ki ham dushman nahīñ haiñ

vafā-dārī kā da.avā kyuuñ kareñ ham

vafā iḳhlās qurbānī mohabbat

ab in lafzoñ kā pīchhā kyuuñ kareñ ham

sunā deñ ismat-e-mariyam kā qissa

par ab is baab ko vā kyoñ kareñ ham

zuleḳhā-e-azīzāñ baat ye hai

bhalā ghāTe kā saudā kyoñ kareñ ham

hamārī hī tamannā kyuuñ karo tum

tumhārī hī tamannā kyuuñ kareñ ham

kiyā thā ahd jab lamhoñ meñ ham ne

to saarī umr iifā kyuuñ kareñ ham

uThā kar kyoñ na pheñkeñ saarī chīzeñ

faqat kamroñ meñ Tahlā kyoñ kareñ ham

jo ik nasl-e-faromāya ko pahuñche

vo sarmāya ikaTThā kyoñ kareñ ham

nahīñ duniyā ko jab parvā hamārī

to phir duniyā kī parvā kyuuñ kareñ ham

barahna haiñ sar-e-bāzār to kyā

bhalā andhoñ se parda kyoñ kareñ ham

haiñ bāshinde usī bastī ke ham bhī

so ḳhud par bhī bharosā kyoñ kareñ ham

chabā leñ kyoñ na ḳhud hī apnā Dhāñcha

tumheñ rātib muhayyā kyoñ kareñ ham

paḌī rahne do insānoñ kī lāsheñ

zamīñ kā bojh halkā kyoñ kareñ ham

ye bastī hai musalmānoñ kī bastī

yahāñ kār-e-masīhā kyuuñ kareñ ham

naya ek rishta paida kyun karen hum

bichhaDna hai to jhagDa kyun karen hum

KHamoshi se ada ho rasm-e-duri

koi hangama barpa kyun karen hum

ye kafi hai ki hum dushman nahin hain

wafa-dari ka dawa kyun karen hum

wafa iKHlas qurbani mohabbat

ab in lafzon ka pichha kyun karen hum

suna den ismat-e-mariyam ka qissa

par ab is bab ko wa kyon karen hum

zuleKHa-e-azizan baat ye hai

bhala ghaTe ka sauda kyon karen hum

hamari hi tamanna kyun karo tum

tumhaari hi tamanna kyun karen hum

kiya tha ahd jab lamhon mein hum ne

to sari umr ifa kyun karen hum

uTha kar kyon na phenken sari chizen

faqat kamron mein Tahla kyon karen hum

jo ek nasl-e-faromaya ko pahunche

wo sarmaya ikaTTha kyon karen hum

nahin duniya ko jab parwa hamari

to phir duniya ki parwa kyun karen hum

barahna hain sar-e-bazar to kya

bhala andhon se parda kyon karen hum

hain bashinde usi basti ke hum bhi

so KHud par bhi bharosa kyon karen hum

chaba len kyon na KHud hi apna Dhancha

tumhein raatib muhayya kyon karen hum

paDi rahne do insanon ki lashen

zamin ka bojh halka kyon karen hum

ye basti hai musalmanon ki basti

yahan kar-e-masiha kyun karen hum