bana di qaum ki kya shakl pahchani nahin jati

banā dī qaum kī kyā shakl pahchānī nahīñ jaatī

magar zarf-e-siyāsat terī arzānī nahīñ jaatī

sitam logoñ kā ho logoñ pe ho logoñ kī ḳhātir ho

ye hai jamhūriyat to ham se pahchānī nahīñ jaatī

vo sab se pūchhte haiñ ho ga.ī kyā kuchh ḳhatā ham se

adā apnī jagah hai un kī nā-dānī nahīñ jaatī

amīr-e-kārvāñ ye kārvāñ manzil kā ḳhvāhāñ hai

magar dar dar kī is se ḳhaak ab chhānī nahīñ jaatī

vo luuTe jā rahe haiñ lauTne ko luuT kī jānib

haqīqat hai burī 'ādat ba-āsānī nahīñ jaatī

siyāsat ho ki jangal yā kisī circus kā piñjrā ho

kahīñ ho sher us kī ḳhū-e-haivānī nahīñ jaatī

mujhe to chaar din kī chāñdnī ke baa'd kā Dar hai

añdherī raat kī hamdam pareshānī nahīñ jaatī

mirā dil vote de detā hai un kī muskurāhaT ko

jahāñ jiite phir un kī hashr-sāmānī nahīñ jaatī

bhalā 'zāmin' diyā hī kyuuñ thā bhārī mandate un ko

vo man-maujī haiñ man le leñ to man-mānī nahīñ jaatī

bana di qaum ki kya shakl pahchani nahin jati

magar zarf-e-siyasat teri arzani nahin jati

sitam logon ka ho logon pe ho logon ki KHatir ho

ye hai jamhuriyat to hum se pahchani nahin jati

wo sab se puchhte hain ho gai kya kuchh KHata hum se

ada apni jagah hai un ki na-dani nahin jati

amir-e-karwan ye karwan manzil ka KHwahan hai

magar dar dar ki is se KHak ab chhani nahin jati

wo luTe ja rahe hain lauTne ko luT ki jaanib

haqiqat hai buri 'adat ba-asani nahin jati

siyasat ho ki jangal ya kisi circus ka pinjra ho

kahin ho sher us ki KHu-e-haiwani nahin jati

mujhe to chaar din ki chandni ke ba'd ka Dar hai

andheri raat ki hamdam pareshani nahin jati

mera dil wote de deta hai un ki muskurahaT ko

jahan jite phir un ki hashr-samani nahin jati

bhala 'zamin' diya hi kyun tha bhaari mandate un ko

wo man-mauji hain man le len to man-mani nahin jati