narm faza ki karwaTen dil ko dukha ke rah gain

narm fazā kī karvaTeñ dil ko dukhā ke rah ga.iiñ

ThanDī havā.eñ bhī tirī yaad dilā ke rah ga.iiñ

shaam bhī thī dhuāñ dhuāñ husn bhī thā udaas udaas

dil ko ka.ī kahāniyāñ yaad sī aa ke rah ga.iiñ

mujh ko ḳharāb kar ga.iiñ nīm-nigāhiyāñ tirī

mujh se hayāt o maut bhī āñkheñ churā ke rah ga.iiñ

husn-e-nazar-fareb meñ kis ko kalām thā magar

terī adā.eñ aaj to dil meñ samā ke rah ga.iiñ

tab kahīñ kuchh pata chalā sidq-o-ḳhulūs-e-husn kā

jab vo nigāheñ ishq se bāteñ banā ke rah ga.iiñ

tere ḳhirām-e-nāz se aaj vahāñ chaman khile

fasleñ bahār kī jahāñ ḳhaak uḌā ke rah ga.iiñ

pūchh na un nigāhoñ kī turfa karishma-sāziyāñ

fitne sulā ke rah ga.iiñ fitne jagā ke rah ga.iiñ

tāroñ kī aañkh bhī bhar aa.ī merī sadā-e-dard par

un kī nigāheñ bhī tirā naam batā ke rah ga.iiñ

uf ye zamīñ kī gardisheñ aah ye ġham kī Thokareñ

ye bhī to baḳht-e-ḳhufta ke shāne hilā ke rah ga.iiñ

aur to ahl-e-dard kaun sambhāltā bhalā

haañ terī shādmāniyāñ un ko rulā ke rah ga.iiñ

yaad kuchh aa.iiñ is tarah bhūlī huī kahāniyāñ

kho.e hue diloñ meñ aaj dard uThā ke rah ga.iiñ

sāz-e-nashāt-e-zindagī aaj laraz laraz uThā

kis kī nigāheñ ishq kā dard sunā ke rah ga.iiñ

tum nahīñ aa.e aur raat rah ga.ī raah dekhtī

tāroñ kī mahfileñ bhī aaj āñkheñ bichhā ke rah ga.iiñ

jhuum ke phir chalīñ havā.eñ vajd meñ aa.iiñ phir fazā.eñ

phir tirī yaad kī ghaTā.eñ sīnoñ pe chhā ke rah ga.iiñ

qalb o nigāh kī ye iid uf ye ma.āl-e-qurb-o-dīd

charḳh kī gardisheñ tujhe mujh se chhupā ke rah ga.iiñ

phir haiñ vahī udāsiyāñ phir vahī suunī kā.enāt

ahl-e-tarab kī mahfileñ rañg jamā ke rah ga.iiñ

kaun sukūn de sakā ġham-zadagān-e-ishq ko

bhīgtī rāteñ bhī 'firāq' aag lagā ke rah ga.iiñ

narm faza ki karwaTen dil ko dukha ke rah gain

ThanDi hawaen bhi teri yaad dila ke rah gain

sham bhi thi dhuan dhuan husn bhi tha udas udas

dil ko kai kahaniyan yaad si aa ke rah gain

mujh ko KHarab kar gain nim-nigahiyan teri

mujh se hayat o maut bhi aankhen chura ke rah gain

husn-e-nazar-fareb mein kis ko kalam tha magar

teri adaen aaj to dil mein sama ke rah gain

tab kahin kuchh pata chala sidq-o-KHulus-e-husn ka

jab wo nigahen ishq se baaten bana ke rah gain

tere KHiram-e-naz se aaj wahan chaman khile

faslen bahaar ki jahan KHak uDa ke rah gain

puchh na un nigahon ki turfa karishma-saziyan

fitne sula ke rah gain fitne jaga ke rah gain

taron ki aankh bhi bhar aai meri sada-e-dard par

un ki nigahen bhi tera nam bata ke rah gain

uf ye zamin ki gardishen aah ye gham ki Thokaren

ye bhi to baKHt-e-KHufta ke shane hila ke rah gain

aur to ahl-e-dard kaun sambhaalta bhala

han teri shadmaniyan un ko rula ke rah gain

yaad kuchh aain is tarah bhuli hui kahaniyan

khoe hue dilon mein aaj dard uTha ke rah gain

saz-e-nashat-e-zindagi aaj laraz laraz uTha

kis ki nigahen ishq ka dard suna ke rah gain

tum nahin aae aur raat rah gai rah dekhti

taron ki mahfilen bhi aaj aankhen bichha ke rah gain

jhum ke phir chalin hawaen wajd mein aain phir fazaen

phir teri yaad ki ghaTaen sinon pe chha ke rah gain

qalb o nigah ki ye id uf ye maal-e-qurb-o-did

charKH ki gardishen tujhe mujh se chhupa ke rah gain

phir hain wahi udasiyan phir wahi suni kaenat

ahl-e-tarab ki mahfilen rang jama ke rah gain

kaun sukun de saka gham-zadagan-e-ishq ko

bhigti raaten bhi 'firaq' aag laga ke rah gain