nahin ye zid ki har ek dard tu mera le ja

nahīñ ye zid ki har ik dard tū mirā le jā

jo ho sake to ye barsoñ kā rat-jagā le jā

tirā to kyā ki ḳhud apnā bhī maiñ kabhī na rahā

mire ḳhayāl se ḳhvāboñ kā silsila le jā

kisī ne duur bahut duur se pukārā phir

diloñ kī qurbateñ āñkhoñ kā fāsla le jā

nikal gayā huuñ bahut apnī zaat se aage

tū mujh se mere bichhaḌne kā sāneha le jā

maiñ ḳhud hī apne ta.āqub meñ phir rahā huuñ abhī

uThā ke tū merī rāhoñ se rāstā le jā

ajiib zahr ravāñ hai lahū kī gardish meñ

kabhī to sholagi-e-jāñ kā zā.iqa le jā

amīr-e-shahr mujhe hurmat-e-hunar hai bahut

ye apnā turra-e-dastār ye qabā le jā

nahin ye zid ki har ek dard tu mera le ja

jo ho sake to ye barson ka rat-jaga le ja

tera to kya ki KHud apna bhi main kabhi na raha

mere KHayal se KHwabon ka silsila le ja

kisi ne dur bahut dur se pukara phir

dilon ki qurbaten aankhon ka fasla le ja

nikal gaya hun bahut apni zat se aage

tu mujh se mere bichhaDne ka saneha le ja

main KHud hi apne taaqub mein phir raha hun abhi

uTha ke tu meri rahon se rasta le ja

ajib zahr rawan hai lahu ki gardish mein

kabhi to sholagi-e-jaan ka zaiqa le ja

amir-e-shahr mujhe hurmat-e-hunar hai bahut

ye apna turra-e-dastar ye qaba le ja