na kyun ki ashk-e-musalsal ho rahnuma dil ka

na kyuuñ ki ashk-e-musalsal ho rahnumā dil kā

tarīq-e-ishq meñ jaarī hai silsila dil kā

dikhā ke dast-e-hinā.ī na ḳhuuñ bahā dil kā

ki aur rañg se lūñgā maiñ ḳhūñ-bahā dil kā

maiñ tifl-e-ashk ko mizhgāñ pe dekh hairāñ huuñ

ki nūr-e-dīda hai yā hai bālakā dil kā

tū aa.ine pe na apne kar ai sikandar naaz

ki ham bhī rakhte haiñ jām-e-jahāñ-numā dil kā

bahisht pahuñche hai zāhid! kab us kī vus.at ko

ajab ravish kā hai ye bāġh-e-dil-kushā dil kā

bajā huuñ sar-ba-garebāñ ki us ke dāman tak

na pahuñchā aah kabhī dast-e-nā-rasā dil kā

tire ḳhadañg-e-mizha se hai yak-qalam majrūh

na pūchh ai but-e-bad-kesh! mājrā dil kā

lagā.ī kis but-e-mai-nosh ne hai taak us par

subū-ba-dosh hai saaqī jo aabla dil kā

hazār bain kaheñ kyuuñ na ahl-e-bīnā.ī

ki saaf bū-qalamoñ hai ye aa.inā dil kā

bahār tujh ko dikhā.eñge ham bhī ai gul-rū

kisī ravish se jo ġhuncha kabhī khilā dil kā

zuhūr-e-jalva-e-ma.abūd hai bahar-sūrat

rakhā hai naam bajā ḳhāna-e-ḳhudā dil kā

ruvāq-e-chashm meñ mat rah ki hai makān-e-nuzūl

tire to vāste ye qasr hai banā dil kā

qarār o tāqat o sabr o ḳhirad hue sab gum

tumhārī zulf meñ abtar hai haal kyā dil kā

kaheñge ham ye sarāsar jo koī pūchhegā

savād-e-hind meñ luuTā hai qāfila dil kā

na kyūñki aah se ḳhātir nishāñ ho ab merī

ki tiir ye nahīñ kartā kabhī ḳhatā dil kā

hamāre daaġh se bhañvre ko kyā bhalā nisbat

ki vo rafīq hai gul kā ye āshnā dil kā

lagā na dil ko tū apne kisī se dekh 'nasīr'

burā na maan ki is meñ nahīñ bhalā dil kā

na kyun ki ashk-e-musalsal ho rahnuma dil ka

tariq-e-ishq mein jari hai silsila dil ka

dikha ke dast-e-hinai na KHun baha dil ka

ki aur rang se lunga main KHun-baha dil ka

main tifl-e-ashk ko mizhgan pe dekh hairan hun

ki nur-e-dida hai ya hai baalaka dil ka

tu aaine pe na apne kar ai sikandar naz

ki hum bhi rakhte hain jam-e-jahan-numa dil ka

bahisht pahunche hai zahid! kab us ki wusat ko

ajab rawish ka hai ye bagh-e-dil-kusha dil ka

baja hun sar-ba-gareban ki us ke daman tak

na pahuncha aah kabhi dast-e-na-rasa dil ka

tere KHadang-e-mizha se hai yak-qalam majruh

na puchh ai but-e-bad-kesh! majra dil ka

lagai kis but-e-mai-nosh ne hai tak us par

subu-ba-dosh hai saqi jo aabla dil ka

hazar bain kahen kyun na ahl-e-binai

ki saf bu-qalamon hai ye aaina dil ka

bahaar tujh ko dikhaenge hum bhi ai gul-ru

kisi rawish se jo ghuncha kabhi khila dil ka

zuhur-e-jalwa-e-mabud hai bahar-surat

rakha hai nam baja KHana-e-KHuda dil ka

ruwaq-e-chashm mein mat rah ki hai makan-e-nuzul

tere to waste ye qasr hai bana dil ka

qarar o taqat o sabr o KHirad hue sab gum

tumhaari zulf mein abtar hai haal kya dil ka

kahenge hum ye sarasar jo koi puchhega

sawad-e-hind mein luTa hai qafila dil ka

na kyunki aah se KHatir nishan ho ab meri

ki tir ye nahin karta kabhi KHata dil ka

hamare dagh se bhanwre ko kya bhala nisbat

ki wo rafiq hai gul ka ye aashna dil ka

laga na dil ko tu apne kisi se dekh 'nasir'

bura na man ki is mein nahin bhala dil ka