na kuchh sitam se tere aah aah karta hun

na kuchh sitam se tire aah aah kartā huuñ

maiñ apne dil kī madad gaah gaah kartā huuñ

na āfrīñ na dilāsā na dil-dahī na nigāh

ġharaz maiñ hī huuñ jo tujh se nibāh kartā huuñ

ise kaheñ haiñ sunā hogā shaiḳh ḳhauf o rajā

udhar tū tauba idhar maiñ gunāh kartā huuñ

tū apne dil kī siyāhī kare hai dho ke safed

maiñ apne naama amal kā siyāh kartā huuñ

tū roz sañg se masjid ke sar paTaktā hai

maiñ us kā naqsh-e-qadam sajda-gāh kartā huuñ

tujhe hai apnī ibādat upar nazar kyūñkar

maiñ us ke fazl ke uupar nigāh kartā huuñ

misāl-e-rishta-e-tasbīh roz o shab 'hātim'

chhupe chhupe maiñ kisī dil meñ raah kartā huuñ

na kuchh sitam se tere aah aah karta hun

main apne dil ki madad gah gah karta hun

na aafrin na dilasa na dil-dahi na nigah

gharaz main hi hun jo tujh se nibah karta hun

ise kahen hain suna hoga shaiKH KHauf o raja

udhar tu tauba idhar main gunah karta hun

tu apne dil ki siyahi kare hai dho ke safed

main apne nama amal ka siyah karta hun

tu roz sang se masjid ke sar paTakta hai

main us ka naqsh-e-qadam sajda-gah karta hun

tujhe hai apni ibaadat upar nazar kyunkar

main us ke fazl ke upar nigah karta hun

misal-e-rishta-e-tasbih roz o shab 'hatim'

chhupe chhupe main kisi dil mein rah karta hun