chashm-e-nam se kisi pe hansta hun
chashm-e-nam se kisī pe hañstā huuñ
aur phir us namī pe hañstā huuñ
ḳhud ko apne hī rū-barū kar ke
apnī ik ik kamī pe hañstā huuñ
hañste hañste bichhaḌ gayā mujh se
us kī zinda-dilī pe hañstā huuñ
us kī ḳhvāhish thī hañstā dekhe mujhe
so maiñ har ik ġhamī pe hañstā huuñ
nā-samajh to nahīñ hai vo itnā
jāntā hai usī pe hañstā huuñ
shab kī dahlīz par qadam rakkhe
sub.h kī raushnī pe hañstā huuñ
vasl-lamhoñ ke vajd meñ aa kar
hijr kī tīrgī pe hañstā huuñ
apnī sāda-mizājī ke ġham meñ
us kī har dil-lagī pe hañstā huuñ
apnī marzī se jī nahīñ saktī
ziist kī bebasī pe hañstā huuñ
chashm-e-nam se kisi pe hansta hun
aur phir us nami pe hansta hun
KHud ko apne hi ru-baru kar ke
apni ek ek kami pe hansta hun
hanste hanste bichhaD gaya mujh se
us ki zinda-dili pe hansta hun
us ki KHwahish thi hansta dekhe mujhe
so main har ek ghami pe hansta hun
na-samajh to nahin hai wo itna
jaanta hai usi pe hansta hun
shab ki dahliz par qadam rakkhe
subh ki raushni pe hansta hun
wasl-lamhon ke wajd mein aa kar
hijr ki tirgi pe hansta hun
apni sada-mizaji ke gham mein
us ki har dil-lagi pe hansta hun
apni marzi se ji nahin sakti
zist ki bebasi pe hansta hun
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
