kaha jo humne hamein dar se kyun uThate ho

kahā jo ham ne hameñ dar se kyuuñ uThāte ho

kahā ki is liye tum yaañ jo ġhul machāte ho

kahā laḌāte ho kyuuñ ham se ġhair ko hamdam

kahā ki tum bhī to ham se nigah laḌāte ho

kahā jo hāl-e-dil apnā to us ne hañs hañs kar

kahā ġhalat hai ye bāteñ jo tum banāte ho''

kahā jatāte ho kyuuñ ham se roz nāz-o-adā

kahā ki tum bhī to chāhat hameñ jatāte ho

kahā ki 'arz kareñ ham pe jo guzartā hai

kahā ḳhabar hai hameñ kyuuñ zabāñ pe laate ho

kahā ki rūThe ho kyuuñ ham se kyā sabab is kā

kahā sabab hai yahī tum jo dil chhupāte ho''

kahā ki ham nahīñ aane ke yaañ to us ne 'nazīr'

kahā ki socho to kyā aap se tum aate ho

kaha jo hum ne hamein dar se kyun uThate ho

kaha ki is liye tum yan jo ghul machate ho

kaha laDate ho kyun hum se ghair ko hamdam

kaha ki tum bhi to hum se nigah laDate ho

kaha jo haal-e-dil apna to us ne hans hans kar

kaha ghalat hai ye baaten jo tum banate ho

kaha jatate ho kyun hum se roz naz-o-ada

kaha ki tum bhi to chahat hamein jatate ho

kaha ki 'arz karen hum pe jo guzarta hai

kaha KHabar hai hamein kyun zaban pe late ho

kaha ki ruThe ho kyun hum se kya sabab is ka

kaha sabab hai yahi tum jo dil chhupate ho

kaha ki hum nahin aane ke yan to us ne 'nazir'

kaha ki socho to kya aap se tum aate ho