mujhe mehman hi jaano raat bhar ka

mujhe mehmāñ hī jaano raat bhar kā

diyā huuñ dostoñ meñ rahguzar kā

sunā.ūñ kyā ki tūlānī bahut hai

fasāna merī umr-e-muḳhtasar kā

chaleñ kah do havāoñ se sambhal ke

bharā rakkhā hai sāġhar chashm-e-tar kā

chale jo dhuup meñ manzil thī un kī

hameñ to khā gayā saaya shajar kā

haTā.e kuchh to patthar Thokaroñ ne

huā to saaf kuchh rasta safar kā

jise duniyā ne bas aañsū hī jaanā

farastāda thā ik dil ke nagar kā

ġhamoñ meñ kis ko maiñ hañsnā sikhā.ūñ

mile bhī qadr-dāñ koī hunar kā

yahāñ to fātah-e-ālam vahī hai

badalnā jis ko aa jaa.e nazar kā

nifāq-e-bāhamī hai jo abhī tak

khaḌā hai rāsta roke 'umar' kā

mujhe mehman hi jaano raat bhar ka

diya hun doston mein rahguzar ka

sunaun kya ki tulani bahut hai

fasana meri umr-e-muKHtasar ka

chalen kah do hawaon se sambhal ke

bhara rakkha hai saghar chashm-e-tar ka

chale jo dhup mein manzil thi un ki

hamein to kha gaya saya shajar ka

haTae kuchh to patthar Thokaron ne

hua to saf kuchh rasta safar ka

jise duniya ne bas aansu hi jaana

farastada tha ek dil ke nagar ka

ghamon mein kis ko main hansna sikhaun

mile bhi qadr-dan koi hunar ka

yahan to fatah-e-alam wahi hai

badalna jis ko aa jae nazar ka

nifaq-e-bahami hai jo abhi tak

khaDa hai rasta roke 'umar' ka