mujhe kahan mere andar se wo nikalega

mujhe kahāñ mire andar se vo nikālegā

parā.ī aag meñ koī na haath Dālegā

vo aadmī bhī kisī roz apnī ḳhalvat meñ

mujhe na pā ke koī ā.īna nikālegā

vo sabz Daal kā panchhī maiñ ek ḳhushk daraḳht

zarā sī der meñ vo apnā rāsta legā

maiñ vo charāġh huuñ jis kī ziyā na phailegī

mire mizāj kā sūraj mujhe chhupā legā

kuredtā hai bahut raakh mere maazī kī

maiñ chuuk jā.ūñ to vo uñgliyāñ jalā legā

vo ik thakā huā raahī maiñ ek band sarā.e

pahuñch bhī jā.egā mujh tak to mujh se kyā legā

mujhe kahan mere andar se wo nikalega

parai aag mein koi na hath Dalega

wo aadmi bhi kisi roz apni KHalwat mein

mujhe na pa ke koi aaina nikalega

wo sabz Dal ka panchhi main ek KHushk daraKHt

zara si der mein wo apna rasta lega

main wo charagh hun jis ki ziya na phailegi

mere mizaj ka suraj mujhe chhupa lega

kuredta hai bahut rakh mere mazi ki

main chuk jaun to wo ungliyan jala lega

wo ek thaka hua rahi main ek band sarae

pahunch bhi jaega mujh tak to mujh se kya lega