mujhe in aate jate mausamon se Dar nahin lagta

mujhe in aate jaate mausamoñ se Dar nahīñ lagtā

na.e aur pur-azīyat manzaroñ se Dar nahīñ lagtā

ḳhamoshī ke haiñ āñgan aur sannāTe kī dīvāreñ

ye kaise log haiñ jin ko gharoñ se Dar nahīñ lagtā

mujhe is kāġhazī kashtī pe ik andhā bharosā hai

ki tūfāñ meñ bhī gahre pāniyoñ se Dar nahīñ lagtā

samundar chīḳhtā rahtā hai pas-manzar meñ aur mujh ko

añdhere meñ akele sāhiloñ se Dar nahīñ lagtā

ye kaise log haiñ sadiyoñ kī vīrānī meñ rahte haiñ

inheñ kamroñ kī bosīda chhatoñ se Dar nahīñ lagtā

mujhe kuchh aisī āñkheñ chāhiyeñ apne rafīqoñ meñ

jinheñ bebāk sachche ā.inoñ se Dar nahīñ lagtā

mire pīchhe kahāñ aa.e ho nā-mā'lūm kī dhun meñ

tumheñ kyā in añdhere rāstoñ se Dar nahīñ lagtā

ye mumkin hai vo un ko maut kī sarhad pe le jaa.eñ

parindoñ ko magar apne paroñ se Dar nahīñ lagtā

mujhe in aate jate mausamon se Dar nahin lagta

nae aur pur-aziyat manzaron se Dar nahin lagta

KHamoshi ke hain aangan aur sannaTe ki diwaren

ye kaise log hain jin ko gharon se Dar nahin lagta

mujhe is kaghazi kashti pe ek andha bharosa hai

ki tufan mein bhi gahre paniyon se Dar nahin lagta

samundar chiKHta rahta hai pas-manzar mein aur mujh ko

andhere mein akele sahilon se Dar nahin lagta

ye kaise log hain sadiyon ki virani mein rahte hain

inhen kamron ki bosida chhaton se Dar nahin lagta

mujhe kuchh aisi aankhen chahiyen apne rafiqon mein

jinhen bebak sachche aainon se Dar nahin lagta

mere pichhe kahan aae ho na-ma'lum ki dhun mein

tumhein kya in andhere raston se Dar nahin lagta

ye mumkin hai wo un ko maut ki sarhad pe le jaen

parindon ko magar apne paron se Dar nahin lagta