mohabbat hai aziyyat hai hujum-e-yas-o-hasrat hai

mohabbat hai aziyyat hai hujūm-e-yās-o-hasrat hai

javānī aur itnī dukh bharī kaisī qayāmat hai

vo maazī jo hai ik majmua ashkoñ aur aahoñ kā

na jaane mujh ko is maazī se kyuuñ itnī mohabbat hai

lab-e-dariyā mujhe lahroñ se yūñhī chahal karne do

ki ab dil ko isī ik shuġhl-e-be-ma.anī meñ rāhat hai

tirā afsāna ai afsāna-ḳhvāñ rañgīñ sahī mumkin

mujhe rūdād-e-ishrat sun ke ro dene kī aadat hai

koī ro.e to maiñ be-vaj.h ḳhud bhī rone lagtā huuñ

ab 'aḳhtar' chāhe tum kuchh bhī kaho ye merī fitrat hai

mohabbat hai aziyyat hai hujum-e-yas-o-hasrat hai

jawani aur itni dukh bhari kaisi qayamat hai

wo mazi jo hai ek majmua ashkon aur aahon ka

na jaane mujh ko is mazi se kyun itni mohabbat hai

lab-e-dariya mujhe lahron se yunhi chahal karne do

ki ab dil ko isi ek shughl-e-be-mani mein rahat hai

tera afsana ai afsana-KHwan rangin sahi mumkin

mujhe rudad-e-ishrat sun ke ro dene ki aadat hai

koi roe to main be-wajh KHud bhi rone lagta hun

ab 'aKHtar' chahe tum kuchh bhi kaho ye meri fitrat hai