apni miTTi se rishta nibhaya karo

apnī miTTī se rishta nibhāyā karo

jab bhī fursat mile gaañv jaayā karo

apne purkhoñ kī jab yaad aa.e tumheñ

peḌ kī chhāñv meñ baiTh jaayā karo

haiñ na.ī qurbateñ bhī zarūrī magar

kuchh purāne bhī rishte nibhāyā karo

is ma.ī june kī chīḳhtī dhuup meñ

kuchh parindoñ ko paanī pilāyā karo

suukh kar āñkheñ patthar sī ho jā.eñgī

itne aañsū na un se bahāyā karo

saḳht dil hai to narmī se jiito use

yā'nī patthar se hiire banāyā karo

āsmānoñ meñ uḌne kī koshish meñ tum

gir bhī jaao to par phaḌphaḌāyā karo

kyā zarūrī hai koī bahānā hī ho

be-sabab bhī kabhī muskurāyā karo

apni miTTi se rishta nibhaya karo

jab bhi fursat mile ganw jaya karo

apne purkhon ki jab yaad aae tumhein

peD ki chhanw mein baiTh jaya karo

hain nai qurbaten bhi zaruri magar

kuchh purane bhi rishte nibhaya karo

is mai june ki chiKHti dhup mein

kuchh parindon ko pani pilaya karo

sukh kar aankhen patthar si ho jaengi

itne aansu na un se bahaya karo

saKHt dil hai to narmi se jito use

ya'ni patthar se hire banaya karo

aasmanon mein uDne ki koshish mein tum

gir bhi jao to par phaDphaDaya karo

kya zaruri hai koi bahana hi ho

be-sabab bhi kabhi muskuraya karo