meri aankhon se hijrat ka wo manzar kyun nahin jata

mirī āñkhoñ se hijrat kā vo manzar kyuuñ nahīñ jaatā

bichhaḌ kar bhī bichhaḌ jaane kā ye Dar kyuuñ nahīñ jaatā

agar ye zaḳhm bharnā hai to phir bhar kyuuñ nahīñ jaatā

agar ye jān-levā hai to maiñ mar kyuuñ nahīñ jaatā

agar tū dost hai to phir ye ḳhanjar kyuuñ hai hāthoñ meñ

agar dushman hai to āḳhir mirā sar kyuuñ nahīñ jaatā

batā.ūñ kis havāle se unheñ bairāg kā matlab

jo taare pūchhte haiñ raat ko ghar kyuuñ nahīñ jaatā

zarā fursat mile qismat kī chausar se to sochūñgā

ki ḳhvāhish aur hāsil kā ye antar kyuuñ nahīñ jaatā

mire saare raqīboñ ne zamīneñ chhoḌ diiñ kab kī

magar ash.ār se mere vo tevar kyuuñ nahīñ jaatā

mujhe bechain karte haiñ ye dil ke an-ginat dhabbe

jo jaatā hai vo yādoñ ko miTā kar kyuuñ nahīñ jaatā

meri aankhon se hijrat ka wo manzar kyun nahin jata

bichhaD kar bhi bichhaD jaane ka ye Dar kyun nahin jata

agar ye zaKHm bharna hai to phir bhar kyun nahin jata

agar ye jaan-lewa hai to main mar kyun nahin jata

agar tu dost hai to phir ye KHanjar kyun hai hathon mein

agar dushman hai to aaKHir mera sar kyun nahin jata

bataun kis hawale se unhen bairag ka matlab

jo tare puchhte hain raat ko ghar kyun nahin jata

zara fursat mile qismat ki chausar se to sochunga

ki KHwahish aur hasil ka ye antar kyun nahin jata

mere sare raqibon ne zaminen chhoD din kab ki

magar ashaar se mere wo tewar kyun nahin jata

mujhe bechain karte hain ye dil ke an-ginat dhabbe

jo jata hai wo yaadon ko miTa kar kyun nahin jata