mere subut bahe ja rahe hain pani mein

mire subūt bahe jā rahe haiñ paanī meñ

kise gavāh banā.ūñ sarā-e-fānī meñ

jo āñsuoñ meñ nahāte rahe so paak rahe

namāz varna kise mil sakī javānī meñ

bhaḌak uThe haiñ phir āñkhoñ meñ āñsuoñ ke charāġh

phir aaj aag lagā dī ga.ī hai paanī meñ

hamīñ the aise kahāñ ke ki apne ghar jaate

baḌe-baḌoñ ne guzārī hai be-makānī meñ

ye be-kanār badan kaun paar kar paayā

bahe chale ga.e sab log is ravānī meñ

visāl o hijr ki ek ik charāġh the donoñ

siyāh ho ke rahe shab ke be-karānī meñ

bas ek lams ki jal jaa.eñ sab ḳhas-o-ḳhāshāk

ise visāl bhī kahte haiñ ḳhush-bayānī meñ

kahānī ḳhatm huī tab mujhe ḳhayāl aayā

tire sivā bhī to kirdār the kahānī meñ

na chāhiye mujhe vo āsmāñ jo merā na ho

maiñ ḳhush huuñ apnī hī miTTī kī āsmānī meñ

mere subut bahe ja rahe hain pani mein

kise gawah banaun sara-e-fani mein

jo aansuon mein nahate rahe so pak rahe

namaz warna kise mil saki jawani mein

bhaDak uThe hain phir aankhon mein aansuon ke charagh

phir aaj aag laga di gai hai pani mein

hamin the aise kahan ke ki apne ghar jate

baDe-baDon ne guzari hai be-makani mein

ye be-kanar badan kaun par kar paya

bahe chale gae sab log is rawani mein

visal o hijr ki ek ek charagh the donon

siyah ho ke rahe shab ke be-karani mein

bas ek lams ki jal jaen sab KHas-o-KHashak

ise visal bhi kahte hain KHush-bayani mein

kahani KHatm hui tab mujhe KHayal aaya

tere siwa bhi to kirdar the kahani mein

na chahiye mujhe wo aasman jo mera na ho

main KHush hun apni hi miTTi ki aasmani mein