meri barbaadi ko chashm-e-moatabar se dekhiye

merī barbādī ko chashm-e-mo'atabar se dekhiye

'mīr' kā dīvān 'ġhālib' kī nazar se dekhiye

muskurā kar yuuñ na apnī rahguzar se dekhiye

jis taraf merī nazar chāhe udhar se dekhiye

haiñ dalīl-e-kam-nigāhī iḳhtilāfāt-e-nazar

zindagī kā ek hī ruḳh hai jidhar se dekhiye

bharte rahte haiñ jahannam zindagī ke chārasāz

dushman-e-jāñ haiñ agar gahrī nazar se dekhiye

mere ġham-ḳhāne ke chāroñ samt haiñ daulat-kade

zindagī kī bhiik miltī hai kidhar se dekhiye

fitratan har aadmī hai tālib-e-amn-o-amāñ

dushmanoñ ko bhī mohabbat kī nazar se dekhiye

bhej dī tasvīr apnī un ko ye likh kar 'shakīl'

aap kī marzī hai chāhe jis nazar se dekhiye

meri barbaadi ko chashm-e-mo'atabar se dekhiye

'mir' ka diwan 'ghaalib' ki nazar se dekhiye

muskura kar yun na apni rahguzar se dekhiye

jis taraf meri nazar chahe udhar se dekhiye

hain dalil-e-kam-nigahi iKHtilafat-e-nazar

zindagi ka ek hi ruKH hai jidhar se dekhiye

bharte rahte hain jahannam zindagi ke chaarasaz

dushman-e-jaan hain agar gahri nazar se dekhiye

mere gham-KHane ke chaaron samt hain daulat-kade

zindagi ki bhik milti hai kidhar se dekhiye

fitratan har aadmi hai talib-e-amn-o-aman

dushmanon ko bhi mohabbat ki nazar se dekhiye

bhej di taswir apni un ko ye likh kar 'shakil'

aap ki marzi hai chahe jis nazar se dekhiye