ye kaisi mehrbani ho rahi hai

ye kaisī mehrbānī ho rahī hai

sharāfat paanī paanī ho rahī hai

na.e kirdār haiñ lekin abhī tak

qalā-bāzī purānī ho rahī hai

chaman meñ phuul masle jā rahe haiñ

'ajab sī bāġhbānī ho rahī hai

na masjid hai na mai-ḳhāna salāmat

ye kaisī hukmrānī ho rahī hai

haram ke tājiroñ se aaj kal bas

butoñ kī pāsbānī ho rahī hai

yahāñ kī dars-gāh-e-makr-o-fan meñ

hamārī rā.egānī ho rahī hai

sar-e-mahfil sitam kī intihā bhī

taġhāful kī zabānī ho rahī hai

miyāñ buniyād ke patthar haiñ ham log

hamīñ se bad-gumānī ho rahī hai

zamāna jāntā hai kis ke dam se

jahāñ meñ zau-fishānī ho rahī hai

kabhī aayā thā vo bazm-e-tarab meñ

abhī tak gulfishānī ho rahī hai

ġhazal ke ḳhush-numā lahje meñ 'akram'

hamārī haq-bayānī ho rahī hai

ye kaisi mehrbani ho rahi hai

sharafat pani pani ho rahi hai

nae kirdar hain lekin abhi tak

qala-bazi purani ho rahi hai

chaman mein phul masle ja rahe hain

'ajab si baghbani ho rahi hai

na masjid hai na mai-KHana salamat

ye kaisi hukmrani ho rahi hai

haram ke tajiron se aaj kal bas

buton ki pasbani ho rahi hai

yahan ki dars-gah-e-makr-o-fan mein

hamari raegani ho rahi hai

sar-e-mahfil sitam ki intiha bhi

taghaful ki zabani ho rahi hai

miyan buniyaad ke patthar hain hum log

hamin se bad-gumani ho rahi hai

zamana jaanta hai kis ke dam se

jahan mein zau-fishani ho rahi hai

kabhi aaya tha wo bazm-e-tarab mein

abhi tak gulfishani ho rahi hai

ghazal ke KHush-numa lahje mein 'akram'

hamari haq-bayani ho rahi hai