saz-e-furqat pe ghazal gao ki kuchh raat kaTe

sāz-e-furqat pe ġhazal gaao ki kuchh raat kaTe

pyaar kī rasm ko chamkāo ki kuchh raat kaTe

jab ye tai hai ki ġham-e-ishq bahut kaafī hai

ġham kā mafhūm hī samjhāo ki kuchh raat kaTe

sub.h ke saath hī ham ḳhud bhī bikhar jā.eñge

do-ghaḌī aur Thahar jaao ki kuchh raat kaTe

dāman-e-dard pe bikhre hue aañsū kī tarah

merī palkoñ pe bhī lahrāo ki kuchh raat kaTe

zikr-e-gulzār sahī qissa-e-dil-dār sahī

zaḳhm ke phuul hī mahkāo ki kuchh raat kaTe

ek ek dard ke siine meñ utar kar dekho

ek ek saañs meñ lahrāo ki kuchh raat kaTe

dil kī vaadī meñ hai tārīk ghaTāoñ kā hujūm

chāñdnī ban ke nikhar jaao ki kuchh raat kaTe

qātil-e-shahr se bach kar maiñ abhī aayā huuñ

maiñ akelā huuñ chale aao ki kuchh raat kaTe

farsh kirnoñ kā bichhā degī sahar aa ke 'ra.īs'

dil ke zaḳhmoñ ko bhī chamkāo ki kuchh raat kaTe

saz-e-furqat pe ghazal gao ki kuchh raat kaTe

pyar ki rasm ko chamkao ki kuchh raat kaTe

jab ye tai hai ki gham-e-ishq bahut kafi hai

gham ka mafhum hi samjhao ki kuchh raat kaTe

subh ke sath hi hum KHud bhi bikhar jaenge

do-ghaDi aur Thahar jao ki kuchh raat kaTe

daman-e-dard pe bikhre hue aansu ki tarah

meri palkon pe bhi lahrao ki kuchh raat kaTe

zikr-e-gulzar sahi qissa-e-dil-dar sahi

zaKHm ke phul hi mahkao ki kuchh raat kaTe

ek ek dard ke sine mein utar kar dekho

ek ek sans mein lahrao ki kuchh raat kaTe

dil ki wadi mein hai tarik ghaTaon ka hujum

chandni ban ke nikhar jao ki kuchh raat kaTe

qatil-e-shahr se bach kar main abhi aaya hun

main akela hun chale aao ki kuchh raat kaTe

farsh kirnon ka bichha degi sahar aa ke 'rais'

dil ke zaKHmon ko bhi chamkao ki kuchh raat kaTe