kuchh alag karna hai to phir bandh mushkil qafiya

kuchh alag karnā hai to phir bāñdh mushkil qāfiya

kartā hai apnī taraf sāme' ko maa.il qāfiya

misra'-e-avval kī zīnat zikr hai farhād kā

misra'-e-sānī meñ rakkho raqs-e-bismil qāfiya

tum muhayyā to karo jānāñ mohabbat kī radīf

shauq se ban jā.egā nāchīz kā dil qāfiya

mehnatoñ se kuchh to rang aayā mire ash'ār meñ

kar rahā hai lafz ke jhurmaT meñ jhilmil qāfiya

mahfiloñ meñ zehn meñ aatī hai tanhā.ī radīf

aur tanhā.ī meñ ho jaatā hai mahfil qāfiya

baiTh kar tanqīd karnā to bahut āsān hai

ho sake to lā.iye mere muqābil qāfiya

baiThtā huuñ she'r kahne jab maiñ 'az.har' ḳhud-ba-ḳhud

lafzoñ kī zambīl se hotā hai hāsil qāfiya

kuchh alag karna hai to phir bandh mushkil qafiya

karta hai apni taraf same' ko mail qafiya

misra'-e-awwal ki zinat zikr hai farhad ka

misra'-e-sani mein rakkho raqs-e-bismil qafiya

tum muhayya to karo jaanan mohabbat ki radif

shauq se ban jaega nachiz ka dil qafiya

mehnaton se kuchh to rang aaya mere ash'ar mein

kar raha hai lafz ke jhurmaT mein jhilmil qafiya

mahfilon mein zehn mein aati hai tanhai radif

aur tanhai mein ho jata hai mahfil qafiya

baiTh kar tanqid karna to bahut aasan hai

ho sake to laiye mere muqabil qafiya

baiThta hun she'r kahne jab main 'azhar' KHud-ba-KHud

lafzon ki zambil se hota hai hasil qafiya