roz KHwabon mein nae rang bhara karta tha

roz ḳhvāboñ meñ na.e rañg bharā kartā thā

kaun thā jo mirī āñkhoñ meñ rahā kartā thā

uñgliyāñ kaaT ke vo apne lahū se aksar

phuul pattoñ pe mirā naam likhā kartā thā

kaisā qātil thā jo hāthoñ meñ liye thā ḳhanjar

chupke chupke mire jiine kī duā kartā thā

haa.e qismat ki yahī chhoḌ ke jaane vaalā

umr bhar saath nibāheñge kahā kartā thā

phuul sā jism sulagte hue sandal kī tarah

dil ke mandir meñ sar-e-shām jalā kartā thā

vo jo ik lamha kisī yaad meñ kaTtā thā 'nazīr'

dil ke jalte hue sho.aloñ ko havā kartā thā

roz KHwabon mein nae rang bhara karta tha

kaun tha jo meri aankhon mein raha karta tha

ungliyan kaT ke wo apne lahu se aksar

phul patton pe mera nam likha karta tha

kaisa qatil tha jo hathon mein liye tha KHanjar

chupke chupke mere jine ki dua karta tha

hae qismat ki yahi chhoD ke jaane wala

umr bhar sath nibahenge kaha karta tha

phul sa jism sulagte hue sandal ki tarah

dil ke mandir mein sar-e-sham jala karta tha

wo jo ek lamha kisi yaad mein kaTta tha 'nazir'

dil ke jalte hue shoalon ko hawa karta tha