ek shaKHs jawan KHak-basar yaad to hoga

ik shaḳhs javāñ ḳhāk-basar yaad to hogā

vo apnī nigāhoñ kā asar yaad to hogā

vo dhuum zamāne meñ mire josh-e-junūñ kī

vo ġhalġhala-e-shām-o-sahar yaad to hogā

bhūle to na hoge vo tajallī kī hikāyat

vo tazkira-e-dāġh-e-jigar yaad to hogā

har gaam pe vo husn kī pur-hosh nigāheñ

vo ishq kā bad-mast safar yaad to hogā

har lamha vo duniyā-e-mohabbat meñ taġhayyur

har saañs meñ vo rañg-e-digar yaad to hogā

vo dil ko tire husn-e-ḳhud-ārā se ta.alluq

vo ḳhaak se paimān-e-nazar yaad to hogā

vo kārgah-e-dahr se ik be-ḳhabarī sī

vo ta.ana-e-har-ahl-e-ḳhabar yaad to hogā

vo diid ki thā rū-kash-e-ārā.ish-e-gītī

pahroñ taraf-e-rāh-guzar yaad to hogā

vo ishq ke jazbāt kā bharpūr talātum

tūfān kī maujoñ meñ guzar yaad to hogā

gum-karda sukūñ pā ke mujhe apnī galī meñ

kahnā vo tajāhul se kidhar yaad to hogā

bholī to na hogī mirī ulfat kī haqīqat

muddat kā fasāna hai magar yaad to hogā

ek shaKHs jawan KHak-basar yaad to hoga

wo apni nigahon ka asar yaad to hoga

wo dhum zamane mein mere josh-e-junun ki

wo ghalghala-e-sham-o-sahar yaad to hoga

bhule to na hoge wo tajalli ki hikayat

wo tazkira-e-dagh-e-jigar yaad to hoga

har gam pe wo husn ki pur-hosh nigahen

wo ishq ka bad-mast safar yaad to hoga

har lamha wo duniya-e-mohabbat mein taghayyur

har sans mein wo rang-e-digar yaad to hoga

wo dil ko tere husn-e-KHud-ara se talluq

wo KHak se paiman-e-nazar yaad to hoga

wo kargah-e-dahr se ek be-KHabari si

wo tana-e-har-ahl-e-KHabar yaad to hoga

wo did ki tha ru-kash-e-araish-e-giti

pahron taraf-e-rah-guzar yaad to hoga

wo ishq ke jazbaat ka bharpur talatum

tufan ki maujon mein guzar yaad to hoga

gum-karda sukun pa ke mujhe apni gali mein

kahna wo tajahul se kidhar yaad to hoga

bholi to na hogi meri ulfat ki haqiqat

muddat ka fasana hai magar yaad to hoga