ye kya ki nind aa gai hum ko dam-e-sahar

ye kyā ki niiñd aa ga.ī ham ko dam-e-sahar

is sub.h ke liye hī to jaage the raat bhar

kuchh is tarah se vo mire hamrāh chal paḌā

duniyā samajh rahī hai use merā ham-safar

kar lenā mujh se baat kabhī maiñ to huuñ abhī

ye vaqt jā rahā hai zarā is se baat kar

māyūsiyoñ kā 'aks hī ubhrā hai bār-hā

dekhā hai maiñ ne aas kī tasvīr khīñch kar

kitnā 'ajīb zāviya thā us nigāh kā

tafsīl de gayā mujhe go thā vo muḳhtasar

jo mujh ko rū-shanās kare mujh se hī 'azīz'

merī nigāh meñ vahī lamha hai mo'tabar

ye kya ki nind aa gai hum ko dam-e-sahar

is subh ke liye hi to jage the raat bhar

kuchh is tarah se wo mere hamrah chal paDa

duniya samajh rahi hai use mera ham-safar

kar lena mujh se baat kabhi main to hun abhi

ye waqt ja raha hai zara is se baat kar

mayusiyon ka 'aks hi ubhra hai bar-ha

dekha hai main ne aas ki taswir khinch kar

kitna 'ajib zawiya tha us nigah ka

tafsil de gaya mujhe go tha wo muKHtasar

jo mujh ko ru-shanas kare mujh se hi 'aziz'

meri nigah mein wahi lamha hai mo'tabar