tere gham ko jaan ki talash thi tere jaan-nisar chale gae

tire ġham ko jaañ kī talāsh thī tire jāñ-nisār chale ga.e

tirī rah meñ karte the sar talab sar-e-rahguzār chale ga.e

tirī kaj-adā.ī se haar ke shab-e-intizār chalī ga.ī

mire zabt-e-hāl se ruuTh kar mire ġham-gusār chale ga.e

na savāl-e-vasl na arz-e-ġham na hikāyateñ na shikāyateñ

tire ahd meñ dil-e-zār ke sabhī iḳhtiyār chale ga.e

ye hamīñ the jin ke libās par sar-e-rah siyāhī likhī ga.ī

yahī daaġh the jo sajā ke ham sar-e-bazm-e-yār chale ga.e

na rahā junūn-e-ruḳh-e-vafā ye rasan ye daar karoge kyā

jinheñ jurm-e-ishq pe naaz thā vo gunāhgār chale ga.e

tere gham ko jaan ki talash thi tere jaan-nisar chale gae

teri rah mein karte the sar talab sar-e-rahguzar chale gae

teri kaj-adai se haar ke shab-e-intizar chali gai

mere zabt-e-haal se ruTh kar mere gham-gusar chale gae

na sawal-e-wasl na arz-e-gham na hikayaten na shikayaten

tere ahd mein dil-e-zar ke sabhi iKHtiyar chale gae

ye hamin the jin ke libas par sar-e-rah siyahi likhi gai

yahi dagh the jo saja ke hum sar-e-bazm-e-yar chale gae

na raha junun-e-ruKH-e-wafa ye rasan ye dar karoge kya

jinhen jurm-e-ishq pe naz tha wo gunahgar chale gae